ការិយាល័យនាយករដ្ឋមន្រ្តីអ៊ីស្រាអែលនិយាយនៅក្នុងសេចក្តីថ្លែងការណ៍ថា សាកសពចំណាប់ថ្នូរអ៊ីស្រាអែល ៣នាក់ ដែលត្រូវបានប្រគល់ជូនមកវិញដោយក្រុមហាម៉ាស ត្រូវបានកំណត់អត្តសញ្ញាណនៅថ្ងៃពុធនេះ ។

សាកសពស្លាប់ទាំងនេះ ត្រូវបានគេកំណត់អត្តសញ្ញាណថាមានឈ្មោះ Tamir Nimrodi វ័យ ២០ឆ្នាំ ដែលជោគវាសនារបស់លោកពុំត្រូវបានគេដឹងច្បាស់នោះទេ រហូតដល់សាកសពរបស់លោកត្រូវបានបញ្ជាក់អត្តសញ្ញាណ លោក Uriel Baruch វ័យ ៣៥ឆ្នាំ ដែលត្រូវបានសម្លាប់នៅក្នុងពិធីបុណ្យតន្រ្តី Nova ដោយក្រុមជីវពលប៉ាឡេស្ទីនកាលពីថ្ងៃទី ៧ ខែតុលា ឆ្នាំ ២០២៣ ហើយសាកសពរបស់លោក ត្រូវបាននាំយកទៅកាន់តំបន់ហ្កាហ្សា លោក Eitan Levi វ័យ ៥៣ឆ្នាំ ដែលបានបាត់ខ្លួនអស់រយៈពេលជាង ២ខែ ក្រោយការវាយប្រហារកាលពីថ្ងៃទី ៧ ខែតុលា មុនពេលកងទ័ពអ៊ីស្រាអែលជូនដំណឹងទៅកាន់គ្រួសាររបស់លោកថា លោកបានស្លាប់ ហើយសាកសពរបស់លោកត្រូវបានរក្សាទុកដោយក្រុមហាម៉ាស ។

សាកសពចំណាប់ថ្នូរទី ៥ដែលត្រូវបានប្រគល់ដោយក្រុមហាម៉ាសកាលពីយប់កន្លងទៅ នៅមិនទាន់កំណត់អត្តសញ្ញាណនោះទេ ហើយសារព័ត៌មានអ៊ីស្រាអែល រាយការណ៍ថា មាននូវភាពស្រពិចស្រពិលចំពោះថាតើគាត់ជាចំណាប់ថ្នូរ ឬក៏មិនមែន ។

មកទល់នឹងពេលនេះ ក្រុមហាម៉ាស បានប្រគល់ចំណាប់ថ្នូររស់ ២០នាក់ និងសាកសពចំណាប់ថ្នូរ ៨នាក់ ក្រោមកិច្ចព្រមព្រៀងរៀបចំឡើងដោយសហរដ្ឋអាមេរិក ដើម្បីបញ្ចប់សង្រ្គាមហ្កាហ្សា នៅសេសសល់សាកសព ២០នាក់ទៀត ដែលក្រុមជីវពលអ៊ិស្លាមមួយនេះ បានប្តេជ្ញាចិត្តថានឹងប្រគល់ជូន ក្រោមកិច្ចព្រមព្រៀងបទឈប់បាញ់ ។

កាលពីថ្ងៃចន្ទកន្លងទៅ អ៊ីស្រាអែលបាន ដោះលែងជនជាតិប៉ាឡេស្ទីនជិត ២ពាន់នាក់ រួមទាំងអ្នកទោសរាប់រយនាក់ដែលត្រូវជាប់ពន្ធនាគារអស់មួយជីវិត ចេញពីមន្ទីរឃុំឃាំងរបស់ខ្លួន ជាផ្នែកមួយនៃកិច្ចព្រមព្រៀងបទឈប់បាញ់ និងដោះលែងចំណាប់ថ្នូរ ជាមួយក្រុមហាម៉ាស នៅតំបន់ហ្កាហ្សាស្ទ្រីប ៕