លោកប្រធានាធិបតី Donald Trump កាលពីថ្ងៃអង្គារ (ទី១៤ ខែតុលា) បានគំរាមដាក់ទណ្ឌកម្មពាណិជ្ជកម្ម ក្នុងនោះរួមទាំងការដំឡើងពន្ធផងដែរ ប្រឆាំងនឹងប្រទេសអេស្ប៉ាញ ដោយបញ្ជាក់ថា លោកមិនសប្បាយចិត្ត ចំពោះការបដិសេធរបស់ប្រទេសនេះ ក្នុងការមិនបង្កើនការចំណាយលើវិស័យការពារជាតិដល់ ៥ភាគរយ ហើយបានចាត់ទុកទង្វើនេះថា ជាការមិនគោរព ចំពោះអង្គការណាតូ (NATO)។

លោក Trump បានប្រាប់អ្នកសារព័ត៌មាននៅឯសេតវិមានថា៖ «ខ្ញុំមិនសប្បាយចិត្តជាមួយប្រទេសអេស្ប៉ាញឡើយ។ នេះគឺជាប្រទេសតែមួយគត់ដែលមិនបានបង្កើនកម្រិតចំណាយដល់ ៥ភាគរយ។ ដូច្នេះ ខ្ញុំមិនសប្បាយចិត្តជាមួយអេស្ប៉ាញទេ»។ លោក Trump បានបន្ថែមថា៖ «ខ្ញុំកំពុងគិតផ្តល់ឲ្យពួកគេនូវការដាក់ទណ្ឌកម្មពាណិជ្ជកម្ម តាមរយៈការដំឡើងពន្ធ ដោយសារតែអ្វីដែលពួកគេបានធ្វើ ហើយខ្ញុំគិតថា ខ្ញុំអាចនឹងធ្វើបែបនោះ»។

គួរបញ្ជាក់ថា លោក Trump បានជំរុញសមាជិករបស់អង្គការណាតូម្តងហើយម្តងទៀតឲ្យចំណាយបន្ថែមទៀត លើការការពារផ្ទាល់ខ្លួនរបស់ពួកគេ ហើយបង្ហាញភាពមិនច្បាស់លាស់ ជុំវិញឆន្ទៈរបស់ទីក្រុងវ៉ាស៊ីនតោន ក្នុងការជួយដល់សមាជិកដែលមិនចំណាយគ្រប់គ្រាន់។ លោកបាននិយាយកាលពីសប្តាហ៍មុន ខណៈពេលដែលជួបជាមួយប្រធានាធិបតីហ្វាំងឡង់ថា អង្គការណាតូគួរតែពិចារណាដកអេស្ប៉ាញចេញពីសម្ព័ន្ធភាពយោធាមួយនេះ ជុំវិញការបដិសេធមិនយល់ព្រម ចំពោះការប្តេជ្ញាចិត្តថ្មី។

ដោយលើកឡើងពីការគំរាមកំហែងដ៏ធំដែលបង្កឡើងដោយរុស្ស៊ី ចាប់តាំងពីមានការឈ្លានពានលើអ៊ុយក្រែនឆ្នាំ២០២២ សមាជិកណាតូ បានអះអាងថា ការប្តេជ្ញាចិត្តចំណាយពីមុនរបស់ពួកគេចំនួន ២ភាគរយនៃផលិតផលក្នុងស្រុកសរុប (GDP) គឺមិនគ្រប់គ្រាន់ទៀតឡើយ។

អេស្ប៉ាញ គឺជាសមាជិកតែមួយគត់នៃសម្ព័ន្ធភាពមានសមាជិក ៣២ប្រទេសដែលមិនប្តេជ្ញាបង្កើនការចំណាយយោធាដល់ ៥ភាគរយនៃ GDP។ ហើយនាយករដ្ឋមន្ត្រីអេស្ប៉ាញ លោក Pedro Sánchez បានធានាការលើកលែងនៅនាទីចុងក្រោយ នៅពេលនោះ ដោយនិយាយថា អេស្ប៉ាញនឹងចំណាយត្រឹមតែ ២,១ភាគរយប៉ុណ្ណោះ ដែលលោកចាត់ទុកថា គឺ «គ្រប់គ្រាន់ និងប្រាកដនិយម»៕