នាយកគ្រប់គ្រងមូលនិធិរូបិយវត្ថុអន្តរជាតិ (IMF) លោកស្រី Kristalina Georgieva កាលពីថ្ងៃអង្គារ (ទី១៤ ខែតុលា) នេះ បាននិយាយថា ការសម្រេចចិត្តរបស់ប្រទេសភាគច្រើន ក្នុងការមិនសងសឹកនឹងអត្រាពន្ធរបស់ប្រធានាធិបតីអាមេរិក លោក Donald Trump គឺជាកត្តាដ៏ធំបំផុត ដែលជំរុញដល់ភាពធន់របស់សេដ្ឋកិច្ចពិភពលោក។

អំឡុងព្រឹត្តិការណ៍មួយ នៅឯកិច្ចប្រជុំប្រចាំឆ្នាំរបស់ IMF និងធនាគារពិភពលោក នៅទីក្រុងវ៉ាស៊ីនតោន សហរដ្ឋអាមេរិក លោកស្រី Georgieva បាននិយាយថា៖ «ខ្ញុំចង់សង្កត់ធ្ងន់ថា រហូតមកដល់ពេលនេះ ប្រទេសដោយភាគច្រើន ក្នុងពិភពលោក បានជ្រើសរើសមិនសងសឹក និងបន្តធ្វើពាណិជ្ជកម្មច្រើន ផ្អែកលើច្បាប់ដែលមានស្រាប់»។ លោកស្រីបានបញ្ជាក់ថា ការសម្រេចបែបនេះ បានបញ្ចៀសភាពតានតឹង ដោយសារការដំឡើងពន្ធសងសឹកគ្នា។

កាលពីព្រឹកថ្ងៃទី១៤ ខែតុលា មូលនិធិនេះបានបង្កើនកម្រិតនៃការព្យាករកំណើនផលិតផលក្នុងស្រុកសរុបសកលឆ្នាំ២០២៥ ជាទស្សនវិស័យសេដ្ឋកិច្ចពិភពលោករបស់ខ្លួនដល់ ៣,២ភាគរយ ដោយលើសពីកម្រិតព្យាករ ៣ភាគរយ កាលពីខែកក្កដា។ ប៉ុន្តែស្ថាប័នពិភពលោកមួយនេះ បានព្រមានថា សង្រ្គាមពាណិជ្ជកម្មថ្មីរបស់សហរដ្ឋអាមេរិក និងចិន ដែលគំរាមកំហែងដោយលោក Trump អាចធ្វើឲ្យទិន្នផលធ្លាក់ចុះខ្លាំង។

នៅក្នុងព្រឹត្តិការណ៍គណៈកម្មាធិការមិនរកប្រាក់ចំណេញ Bretton Woods លោកស្រី Georgieva បានបន្ថែមថា ការគាំទ្រផងដែរដល់កំណើនសេដ្ឋកិច្ចសកល គឺថា អត្រាពន្ធដ៏មានប្រសិទ្ធភាពរបស់សហរដ្ឋអាមេរិក បានធ្លាក់ទាបខុសពីការប៉ាន់ស្មានពីមុន៕