ប្រធានាធិបតីអាមេរិកលោក Donald Trump បានប្រកាសពីការចាប់ផ្តើម «ដំណាក់កាលទី២» នៃកិច្ចព្រមព្រៀងបទឈប់បាញ់ នៅតំបន់ហ្កាហ្សា កាលពីថ្ងៃអង្គារ (ទី១៤ ខែតុលា) បន្ទាប់ពីមានការដោះលែងចំណាប់ថ្នូរជនជាតិអ៊ីស្រាអែលចំនួន ២០នាក់ ក្រោមដំណាក់កាលដំបូងនៃកិច្ចព្រមព្រៀងសម្របសម្រួលដោយប្រទេសទួរគី សហរដ្ឋអាមេរិក កាតា និងអេហ្ស៊ីប។

នៅលើបណ្ដាញសង្គម Truth Social លោក Trump បានសរសេរថា៖ «ចំណាប់ថ្នូរទាំង ២០នាក់ បានត្រលប់មកវិញហើយ ហើយមានស្ថានភាពល្អប្រសើរដូចការរំពឹងទុក»។ លោកបានបន្ថែមថា៖ «បន្ទុកធំមួយ ត្រូវបានសម្រាលហើយ ប៉ុន្តែការងារមិនទាន់ចប់សព្វគ្រប់នៅឡើយទេ។ អ្នកស្លាប់មិនទាន់បានប្រគល់ត្រលប់មកវិញ តាមការសន្យាឡើយ។ ដំណាក់កាលទី២ ចាប់ផ្តើមហើយ»។

ក្រុមហាម៉ាស និងអ៊ីស្រាអែលបានធ្វើការដោះដូរអ្នកទោស-ចំណាប់ថ្នូរ ដែលឃើញថា អ្នកទោសប៉ាឡេស្ទីនរាប់រយនាក់ ត្រូវបានដោះលែងពីពន្ធនាគារយោធា Ofer របស់អ៊ីស្រាអែល និងពន្ធនាគារផ្សេងទៀតនៅតំបន់វាលខ្សាច់ Negev Desert។ ចំណាប់ថ្នូរអ៊ីស្រាអែលនៅរស់ទាំង ២០នាក់ ក៏មានសេរីភាពដែរ។

លោក Trump និងប្រធានាធិបតីអេហ្ស៊ីប លោក Abdel Fattah al-Sisi បានបើកកិច្ចប្រជុំកំពូលមួយ កាលពីថ្ងៃចន្ទ នៅទីក្រុងរមណីយដ្ឋាន Sharm el-Sheikh របស់អេហ្ស៊ីប ដោយជួបជុំមេដឹកនាំពិភពលោក ដើម្បីប្រមែប្រមូលការគាំទ្រអន្តរជាតិ សម្រាប់ផែនការបទឈប់បាញ់ហ្កាហ្សារបស់មេដឹកនាំអាមេរិក។

ដំណាក់កាលទី២ នៃកិច្ចព្រមព្រៀងរបស់សហរដ្ឋអាមេរិក អំពាវនាវឲ្យមានការបង្កើតយន្តការគ្រប់គ្រងថ្មីមួយ នៅតំបន់ហ្កាហ្សា ការបង្កើតកងកម្លាំងចម្រុះជាតិសាសន៍ និងការរំសាយអាវុធរបស់ក្រុមហាម៉ាស៕