ភ្លៀងធ្លាក់ខ្លាំងយ៉ាងយូរ នៅទីក្រុងហាណូយ ប្រទេសវៀតណាម បានធ្វើឲ្យហានិភ័យកើនឡើងកាន់តែខ្ពស់ពីការមានជំងឺគ្រុនឈាម ក្នុងសហគមន៍មូលដ្ឋានរយៈពេលប៉ុន្មានថ្ងៃថ្មីៗនេះ ដែលជំរុញឲ្យការត្រួតពិនិត្យ និងការចូលមន្ទីរពេទ្យកើនឡើងខ្លាំង។

យោងតាមមជ្ឈមណ្ឌលគ្រប់គ្រងជំងឺទីក្រុងហាណូយ បានឲ្យដឹងថា ទីក្រុងនេះបានកត់ត្រាករណីជំងឺគ្រុនឈាមចំនួន ៣៣៦ករណី កាលពីសប្តាហ៍មុន។ ក្រុមនៃការផ្ទុះឡើងថ្មីចំនួន ១៧ករណី ត្រូវបានរកឃើញ ខណៈដែលក្រុមនៃអ្នកជំងឺគ្រុនឈាមសកម្ម ៣០ករណី កំពុងត្រូវបានតាមដាននៅទូទាំងទីក្រុងនេះ។

មន្ទីរពេទ្យជាតិ សម្រាប់ជំងឺត្រូពិក បានទទួលអ្នកជម្ងឺគ្រុនឈាមដែលមានចំនួនកើនឡើង ក្នុងនោះរួមមានទាំងអ្នកជំងឺមួយចំនួន ដែលស្ថិតក្នុងស្ថានភាពធ្ងន់ធ្ងរ ដោយមានអាការល្ហិតល្ហៃ និងហូរឈាមខ្លាំង។

គួរបញ្ជាក់ថា បន្ទាប់ពីមានភ្លៀងធ្លាក់ខ្លាំង និងទឹកជំនន់ដែលបង្កឡើងដោយព្យុះទីហ្វុងលេខ ១០ និងលេខ ១១ សត្វមូសបានកើតឡើងយ៉ាងច្រើន សូម្បីតែនៅទីក្រុងហាណូយ។ លោកវេជ្ជបណ្ឌិត Nguyen Thanh Binh អនុប្រធាននាយកដ្ឋានមេរោគ និងប៉ារ៉ាស៊ីតវិទ្យា បាននិយាយថា បច្ចុប្បន្នមន្ទីរពេទ្យ កំពុងព្យាបាលអ្នកជម្ងឺគ្រុនឈាមចំនួន ១៧នាក់ ដែលទាំងអស់ត្រូវបានតាមដានយ៉ាងដិតដល់រៀងរាល់ ៣ម៉ោងម្តង។

ទឹកជំនន់នាពេលថ្មីៗនេះ និងទឹកមិនទាន់ស្រកអស់ ក្នុងខេត្តភាគខាងជើង បានបង្កជាលក្ខខណ្ឌអំណោយផលដល់ការកកំណើតរបស់សត្វមូស ដែលធ្វើឲ្យមានហានិភ័យកាន់តែខ្ពស់នៃការកើតជំងឺគ្រុនឈាម និងជំងឺឆ្លងផ្សេងៗទៀត៕