លោកប្រធានាធិបតី Donald Trump កាលពីថ្ងៃអង្គារ (ទី១៤ ខែតុលា) បានបញ្ជាក់ថា ការគាំទ្ររបស់សហរដ្ឋអាមេរិក ចំពោះប្រទេសអាហ្សង់ទីន ពឹងផ្អែកជោគជ័យនៃគណបក្សកាន់អំណាចរបស់លោក Javier Milei នៅក្នុងការបោះឆ្នោតសភាពាក់កណ្តាលអាណត្តិ នាខែនេះ ដោយនិយាយថា លោកនឹងមិនខ្ជះខ្ជាយពេលវេលានោះឡើយ ប្រសិនបើគណបក្សរបស់លោកប្រធានាធិបតីរូបនោះមិនទទួលបានជ័យជម្នះ។

លោក Trump និងលោក Milei បានជួបគ្នានៅសេតវិមាន ពោលគឺត្រឹមតែប៉ុន្មានថ្ងៃបន្ទាប់ពីសហរដ្ឋអាមេរិក បានយល់ព្រមផ្តល់ការគាំទ្រផ្នែកហិរញ្ញវត្ថុដ៏សំខាន់ដល់ប្រទេសអាមេរិកខាងត្បូងមួយនេះ។

មុនអាហារថ្ងៃត្រង់នៅសេតវិមានជាមួយលោក Milei និងសមាជិកគណៈរដ្ឋមន្ត្រីរបស់លោក Trump លោក Trump បាននិយាយថា៖ «ខ្ញុំនៅជាមួយបុរសម្នាក់នេះ ព្រោះទស្សនវិជ្ជារបស់លោក គឺត្រឹមត្រូវ ហើយគាត់អាចនឹងឈ្នះវា (ការបោះឆ្នោតមុនអាណត្តិ)។ គាត់អាចមិននឹងឈ្នះ ប៉ុន្តែខ្ញុំគិតថា គាត់នឹងឈ្នះ ហើយប្រសិនបើគាត់ឈ្នះ យើងបន្តនៅជាមួយគាត់ ហើយប្រសិនបើគាត់មិនឈ្នះទេ ពួកយើងនឹងទៅ»។

ការកត់សម្គាល់របស់លោក Trump បានធ្វើឲ្យទីផ្សារអាហ្សង់ទីនប្រែប្រួល ដែលត្រូវបានជំរុញដោយកញ្ចប់ជំនួយត្រូវបានប្រកាសនាពេលថ្មីៗនេះ ពីសំណាក់រដ្ឋមន្ត្រីក្រសួងរតនាគារសហរដ្ឋអាមេរិក លោក Scott Bessent។ ចំណុចសំខាន់នៃកិច្ចព្រមព្រៀងនោះ គឺការដោះដូររូបិយប័ណ្ណ ២០ពាន់លានដុល្លារជាមួយធនាគារកណ្តាលរបស់អាហ្សង់ទីន ដោយប្តូរប្រាក់ដុល្លារអាមេរិកជាប្រាក់ប៉េសូ។ ទីផ្សារភាគហ៊ុនដ៏ធំរបស់អាហ្សង់ទីន បានប្តូរពីការហក់ឡើងនាពេលព្រឹក ទៅជាធ្លាក់ចុះប្រហែល ២ភាគរយ បន្ទាប់ពីមានការអត្ថាធិប្បាយរបស់លោក Trump៕