ក្រុមតាលីបង់ និយាយថា ជនស៊ីវិលជាង ១២នាក់ ត្រូវបានសម្លាប់នៅក្នុងប្រទេសអាហ្វហ្គានីស្ថាន ស្របពេលការប្រយុទ្ធគ្នាថ្មី បានផ្ទុះឡើងរវាងកងកម្លាំងអាហ្វហ្គានីស្ថាន និងកម្លាំងប៉ាគីស្ថាន នាថ្ងៃពុធនេះ ធ្វើឲ្យបំផ្លាញសន្តិភាពដ៏ផុយស្រួលដែលបានផ្អាកមួយរយៈពេល បន្ទាប់ពីការប៉ះទង្គិចគ្នាកាលពីចុងសប្តាហ៍កន្លងទៅរវាងប្រទេសទាំង ២ បានសម្លាប់មនុស្សរាប់សិបនាក់ ។

ការប៉ះទង្គិចគ្នាកាលពីពេលថ្មីៗរវាងប្រទេសនៅអាស៊ីខាងត្បូងទាំង ២ បានផ្ទុះឡើង ក្រោយពេលទីក្រុង Islamabad ទាមទារឲ្យរដ្ឋបាលតាលីបង់អាហ្វហ្គានីស្ថាន ចាត់វិធានការប្រឆាំងក្រុមជីវពលដែលបានបង្កើនការវាយប្រហារនៅប៉ាគីស្ថាន ដោយនិយាយថា ពួកគេប្រតិបត្តិការចេញពីតំបន់លាក់ខ្លួននៅអាហ្វហ្គានីស្ថាន ។

ទោះបីជាយ៉ាងក៏ដោយ ក្រុមតាលីបង់ បានច្រានចោលវត្តមានរបស់ក្រុមជីវពលប៉ាគីស្ថាននៅអាហ្វហ្គានីស្ថាន ។

លោក Zabihullah Mujahid គឺជាអ្នកនាំពាក្យក្រុមតាលីបង់អាហ្វហ្គានីស្ថាន និយាយនៅលើបណ្តាញព័ត៌មានសង្គម Xថា ការបាញ់ប្រហារបង្កហេតុរបស់ប៉ាគីស្ថាន បានសម្លាប់ជនស៊ីវិល ១២នាក់ និងមនុស្សជាង ១០០នាក់ផ្សេងទៀត បានរងថរបួសនៅទីក្រុង Spin Boldak ។

ដោយឡែក ក្រុមមន្រ្តីប៉ាគីស្ថាន បានដាក់ការស្តីបន្ទោសក្រុមតាលីបង់ សម្រាប់ការប៉ះទង្គិចគ្នានេះ ហើយពួកគេនិយាយថា ជនស៊ីវិល ៤នាក់ បានរងរបួសនៅភាគីខាងព្រំដែនរបស់ពួកគេ ៕