ប្រភពសន្តិសុខមួយ បានឲ្យដឹងថា បេក្ខជនតំណែងសមាជិកសភាអ៊ីរ៉ាក់ម្នាក់ ត្រូវបានសម្លាប់ ហើយអង្គរក្សរបស់ជនរងគ្រោះ ៣នាក់ បានរងរបួស នៅពេលដែលគ្រាប់បែកមួយគ្រាប់ បានផ្ទុះក្បែររថយន្តរបស់លោក នៅភាគខាងជើងនៃទីក្រុងបាកដាដ។

ហេតុការណ៍នេះ គឺជាការសម្លាប់បេក្ខជនលើកដំបូង នៅមុនការបោះឆ្នោតសភារបស់ប្រទេសអ៊ីរ៉ាក់ ដែលគ្រោងនឹងកើតឡើងនៅថ្ងៃទី១១ ខែវិច្ឆិកា។

ប្រភពដែលសុំនិយាយក្នុងលក្ខខណ្ឌមិនបញ្ចេញឈ្មោះ បានប្រាប់បណ្ដាញសារព័ត៌មានមួយថា៖ «គ្រាប់បែកមួយគ្រាប់បានផ្ទុះនៅក្រោមរថយន្តរបស់លោក Safaa al-Mashhadani ជាសមាជិកបច្ចុប្បន្ននៃក្រុមប្រឹក្សាខេត្ត Baghdad និងជាបេក្ខជនតំណាងរាស្រ្ត។ លោកបានស្លាប់ភ្លាមៗ ហើយអង្គរក្សរបស់លោក ៣នាក់ បានរងរបួសធ្ងន់»។

ប្រភពបានប្រាប់បន្ថែមថា «ឧប្បត្តិហេតុបានកើតឡើងនាពេលព្រឹកព្រលឹមថ្ងៃពុធ នៅតំបន់ Tarmiyah» ដែលស្ថិតនៅចម្ងាយ ៤០គីឡូម៉ែត្រ នៅភាគខាងជើងនៃរដ្ឋធានី និងជាផ្នែកនៃខេត្ត Baghdad។

លោក Al-Mashhadani កំពុងឈរឈ្មោះជាមួយក្រុម Sovereignty Alliance ដែលជាសម្ព័ន្ធមូស្លីមនិកាយស៊ុននីដ៏ធំបំផុតមួយ ដែលដឹកនាំដោយពាណិជ្ជករ លោក Khamis al-Khanjar និងប្រធានសភា លោក Mahmoud al-Mashhadani។

សម្ព័ន្ធនេះបានថ្កោលទោសការប្រព្រឹត្ត «ឧក្រិដ្ឋកម្មដ៏កំសាក» នេះ ដោយចាត់ទុកទង្វើនេះថា ជា «ការពង្រីកបន្ថែមនូវវិធីសាស្រ្តរារាំង កំណត់គោលដៅ និងចាត់វិធានការទុច្ចរិត ដែលអនុវត្តដោយកងកម្លាំងប្រដាប់អាវុធខុសច្បាប់ និងក្រុមប្រព្រឹត្តអំពើភេរវកម្ម»៕