បើតាមប្រភពដែលដឹងពីបញ្ហានេះ បានប្រាប់ថា នាយករដ្ឋមន្ត្រីចិន លោក Li Qiang នឹងបំពេញទស្សនកិច្ច នៅសិង្ហបុរី នាចុងខែតុលានេះ ដែលជាដំណើរទស្សនកិច្ចលើកដំបូងទៅកាន់ប្រទេសនេះពីមន្ត្រីលំដាប់ទី២ របស់ប្រទេសចិន ក្នុងរយៈពេល ៧ឆ្នាំ ខណៈដែលរដ្ឋាភិបាលទាំង២ កំពុងប្រឹងប្រែងធ្វើឲ្យទំនាក់ទំនងកាន់តែស៊ីជម្រៅ។

បើយោងតាមប្រភពដែលបានសុំនិយាយដោយមិនបញ្ចេញឈ្មោះ ដោយសារការពិភាក្សាជាព័ត៌មានឯកជន បានឲ្យដឹងថា លោក Li នឹងធ្វើទស្សនកិច្ចបុរីរដ្ឋនេះ ដើម្បីប្រារព្ធខួបលើកទី៣៥ នៃទំនាក់ទំនងការទូត មុនពេលចូលរួមការប្រជុំនៃប្រជាជាតិអាស៊ីអាគ្នេយ៍ ក្នុងប្រទេសម៉ាឡេស៊ី ចាប់ពីថ្ងៃទី២៦ ខែតុលា។ 

ប្រភពមួយ ក្នុងចំណោមប្រភពទាំងនោះ បានបញ្ជាក់ថា ផែនការនេះ នៅតែមិនទាន់បញ្ចប់សព្វគ្រប់នោះទេ ហើយអាចមានការប្រែប្រួល។ ក្រសួងការបរទេសចិន និងសិង្ហបុរី មិនបានឆ្លើយតបភ្លាមៗនោះឡើយ ចំពោះសំណើសុំការអត្ថាធិប្បាយ។

លើកចុងក្រោយ ប្រទេសចិនបានបញ្ជូនថ្នាក់ដឹកនាំលំដាប់ទី២ របស់ខ្លួនទៅកាន់មជ្ឈមណ្ឌលហិរញ្ញវត្ថុអាស៊ីអាគ្នេយ៍មួយនេះ ក្នុងឆ្នាំ២០១៨ ដែលនៅពេលនោះនាយករដ្ឋមន្ត្រី លោក Li Keqiang បានធ្វើជាអធិបតីក្នុងការផ្លាស់ប្តូរកិច្ចព្រមព្រៀងគ្របដណ្តប់លើវិស័យពាណិជ្ជកម្ម ហិរញ្ញវត្ថុ និងវិស័យផ្សេងៗទៀត។

នាយករដ្ឋមន្ត្រីសិង្ហបុរី លោក Lawrence Wong បានទៅបំពេញទស្សនកិច្ចនៅទីក្រុងប៉េកាំង ក្នុងខែមិថុនា ឆ្នាំ២០២៥ ហើយបានជួបជាមួយលោក Li Qiang។ វាគឺជាដំណើរទស្សនកិច្ចលើកដំបូងរបស់លោកនាយករដ្ឋមន្រ្តី Wong នៅក្រៅអាស៊ីអាគ្នេយ៍ គិតចាប់តាំងពីលោកបានចូលកាន់តំណែងខ្ពស់បំផុតរបស់ប្រទេសនៅឆ្នាំ២០២៤៕