យោធាអ៊ីស្រាអែល នៅថ្ងៃពុធ (ទី១៥ ខែតុលា) នេះ បានបញ្ជាក់ឲ្យដឹងថា សាកសពម្នាក់ ក្នុងចំណោមសពទាំង ៤នាក់ ដែលត្រូវបានប្រគល់ដោយក្រុមហាម៉ាស ជាផ្នែកនៃការដោះដូរជាមួយអ្នកទោសប៉ាឡេស្ទីននោះ មិនមែនជាអតីតចំណាប់ថ្នូររូបណាឡើយ។

បន្ទាប់ពីការធ្វើកោសល្យវិច័យពេញមួយយប់ លើសាកសពចំនួន ៤នាក់នោះ ដែលត្រូវបានប្រគល់ត្រឡប់មកវិញ កាលពីថ្ងៃអង្គារ កងទ័ពបានឲ្យដឹងថា មន្ត្រីពេទ្យបានសន្និដ្ឋានថា សាកសពម្នាក់ «មិនត្រូវនឹងអត្តសញ្ញាណចំណាប់ថ្នូររូបណាឡើយ»។ យោធាបានព្រមានថា៖ «ក្រុមហាម៉ាសត្រូវបានតម្រូវឲ្យធ្វើនូវកិច្ចប្រឹងប្រែងចាំបាច់ទាំងអស់ ដើម្បីប្រគល់មកវិញនូវចំណាប់ថ្នូរដែលបានបាត់បង់ជីវិត»។

ចាប់តាំងពីថ្ងៃចន្ទមក ក្រោមកិច្ចព្រមព្រៀងឈប់បាញ់ដែលសម្របសម្រួលដោយប្រធានាធិបតីអាមេរិក លោក Donald Trump ក្រុមហាម៉ាសបានប្រគល់ចំណាប់ថ្នាក់អ៊ីស្រាអែលនៅរស់ចំនួន 20 នាក់ និងសាកសព ៨នាក់ ក្នុងនោះមានជនជាតិនេប៉ាល់ម្នាក់ ជនជាតិអ៊ីស្រាអែល ៦នាក់ ហើយឥឡូវនេះសាកសពទី៨ មិនស្គាល់អត្តសញ្ញាណ ។

ព័ត៌មាន ដែលថា អដ្ឋិធាតុមួយ មិនមែនជារបស់នរណាម្នាក់នៅក្នុងបញ្ជីឈ្មោះអតីតចំណាប់ថ្នូរដែលបានស្លាប់ទាំង ២៨នាក់របស់អ៊ីស្រាអែល អាចបង្កើនឲ្យសម្ពាធក្នុងប្រទេស លើរដ្ឋាភិបាលរបស់នាយករដ្ឋមន្ត្រី លោក Benjamin Netanyahu ដើម្បីឲ្យរឹតបន្តឹងការអនុញ្ញាតផ្ដល់ជំនួយទៅកាន់តំបន់ហ្កាហ្សា៕