នៅថ្ងៃពុធនេះ ក្រសួងការបរទេសចិន និយាយថា សង្រ្គាមពាណិជ្ជកម្ម និងសង្រ្គាមពន្ធ គ្មានអ្នកឈ្នះនោះទេ ជាការឆ្លើយតបចំពោះសេចក្តីអត្ថាធិប្បាយរបស់ប្រធានាធិបតីសហរដ្ឋអាមេរិកលោក Donald Trump លើការបញ្ចប់ទំនាក់ទំនងពាណិជ្ជកម្មជាមួយចិន រួមទាំងការជាប់ពាក់ព័ន្ធនឹងប្រេងឆាផងដែរ ។

លោក Lin Jian គឺជាអ្នកនាំពាក្យក្រសួងការបរទេសចិននិយាយនៅក្នុងសន្និសីទសារព័ត៌មានថា ភាគីទាំង ២ គួរដោះស្រាយបញ្ហាពាក់ព័ន្ធ តាមរយៈការពិគ្រោះយោបល់គ្នា ផ្អែកលើភាពស្មើភាពគ្នា ការគោរពគ្នាទៅវិញទៅមក ហើយនិងមានទៅមានមក ។

លោក Trump បានសរសេរនៅលើប្រព័ន្ធផ្សព្វផ្សាយសង្គមថា លោកជឿថាប្រទេសចិនមានចេតនាមិនទិញសណ្តែកសៀងរបស់អាមេរិក និងបង្កការលំបាកដល់កសិករសណ្តែកសៀងរបស់លោក គឺជាច្បាប់អរិភាពសេដ្ឋកិច្ច ។ ពួកលោកកំពុងពិចារណាបញ្ចប់អាជីវកម្មជាមួយប្រទេសចិន ដែលទាក់ទងនឹងប្រេងឆា និងធាតុផ្សេងទៀតនៃពាណិជ្ជកម្ម ជាការសងសឹក ។ 

ប្រទេសចិនបានកាត់បន្ថយការទិញសណ្តែកសៀងរបស់សហរដ្ឋអាមេរិកយ៉ាងខ្លាំង ដែលលោក Trump បានហៅថាជាតាកទិកការចរចា ។ 

លោក Trump បាននិយាយនៅក្នុងខែតុលានេះថា លោកសង្ឃឹមថានឹងពិភាក្សាអំពីសណ្តែកសៀងជាមួយសមភាគីចិនរបស់លោក គឺលោក Xi Jinping ទន្ទឹមនឹងលោកក៏បានព្រមានផងដែរថា សហរដ្ឋអាមេរិកអាចនឹងបញ្ឈប់ការនាំចូលមួយចំនួនធំពីប្រទេសចិន ។ 

សូមបញ្ជាក់ថា ប្រទេសចិនគឺជាអ្នកទិញសណ្តែកសៀងធំជាងគេបំផុតរបស់ពិភពលោក ហើយក្នុងរយៈពេលប៉ុន្មានខែថ្មីៗនេះបានកាត់បន្ថយការទិញសណ្តែកសៀងរបស់សហរដ្ឋអាមេរិកយ៉ាងខ្លាំងដោយងាកទៅរកប្រភពពីប្រទេសប្រេស៊ីល និងអាហ្សង់ទីន ស្របពេលមានជម្លោះការដំឡើងពន្ធ និងពាណិជ្ជកម្ម ។

ដោយឡែក សហរដ្ឋអាមេរិក គឺជាទីផ្សារកំពូលរបស់ចិន សម្រាប់ប្រេងឆា ដោយបាននាំចូលទម្ងន់ជាប់កំណត់ត្រា ១,២៧លានតោន មានតម្លៃ ១,១ពាន់លានដុល្លារ កាលពីឆ្នាំ ២០២៤ ៕