មន្ត្រីជាន់ខ្ពស់ទីក្រុង Kyiv មួយរូបបាននិយាយកាលពីថ្ងៃពុធសប្ដាហ៍នេះថា គណៈប្រតិភូរដ្ឋាភិបាលអ៊ុយក្រែនបានជួបបណ្ដាក្រុមហ៊ុនផលិតសព្វាវុធដ៏លេចធ្លោរបស់អាមេរិកក្នុងអំឡុងពេលទស្សនកិច្ចនៅសហរដ្ឋអាមេរិក មុនពេលកិច្ចប្រជុំរបស់ប្រធានាធិបតី Volodymyr Zelenskyy ជាមួយសមភាគីអាមេរិក លោក Donald Trump នៅសេតវិមាន ចុងសប្តាហ៍នេះ។     

គណៈប្រតិភូដឹកនាំដោយប្រធានការិយាល័យប្រធានាធិបតីអ៊ុយក្រែន លោក Andrii Yermak និងលោកស្រីនាយករដ្ឋមន្ត្រី Yuliia Svyrydenko បានជួបជាមួយតំណាងក្រុមហ៊ុន Lockheed Martin និង រេហ្វីអន (Raytheon)។   

លោក Yermak ពុំបានប្រាប់ពីអ្វីដែលត្រូវបានពិភាក្សាក្នុងអំឡុងពេលកិច្ចពិភាក្សានោះទេ ប៉ុន្តែបាននិយាយថាកិច្ចសហប្រតិបត្តិការប្រទេសរបស់លោកជាមួយក្រុមហ៊ុនទាំងពីរ បន្តរីកចម្រើន ខណៈអ៊ុយក្រែនស្វែងរកជំនួយបន្ថែមទៀតដើម្បីទប់ទល់នឹងសង្គ្រាមដ៏ខ្លាំងក្លារបស់រុស្ស៊ីដែលបានចាប់ផ្តើមកាលពីថ្ងៃ២៤ កុម្ភៈ ឆ្នាំ២០២២។

លោក Mykhailo Podolyak ទីប្រឹក្សាជាន់ខ្ពស់របស់លោក Yermak បានបង្ហោះនៅលើបណ្ដាញសង្គម X ថា អ៊ុយក្រែនកំពុងស្វែងរកមីស៊ីលតម្រង់គោលដៅ ប្រព័ន្ធការពារដែនអាកាស និងកិច្ចព្រមព្រៀងផលិតយានដ្រូន រួមគ្នាពីសហរដ្ឋអាមេរិក។ 

ទន្ទឹមនឹងលោក Zelenskyy ត្រូវគេរំពឹងយ៉ាងទូលំទូលាយថានឹងស្នើសុំឱ្យលោក Trump បន្តដំណើរទៅមុខនៅការិយាល័យ Oval ដើម្បីទទួលបានមីស៊ីល Tomahawks ទីក្រុងវ៉ាស៊ីនតោន បានស្ទាក់ស្ទើរចំពោះចំណាត់ការបែបនេះដោយបារម្ភថាអាចដុតបញ្ឆេះឲ្យសង្រ្គាមរីកធំ និងធ្វើឱ្យភាពតានតឹងកាន់តែខ្លាំង រវាងសហរដ្ឋអាមេរិក និងរុស្ស៊ី៕