ប្រធានផ្នែកមនុស្សធម៌របស់អង្គការសហប្រជាជាតិ លោក Tom Fletcher កាលពីថ្ងៃពុធ ទី១៥ ខែតុលា បានអំពាវនាវឱ្យអ៊ីស្រាអែលបើកច្រកឆ្លងកាត់ព្រំដែនទាំងអស់ចូលទៅក្នុងតំបន់ហ្កាហ្សាជាបន្ទាន់សម្រាប់ការដឹកជញ្ជូនជំនួយ ដោយបានព្រមានពីការពន្យារពេលដោយសារតែការឆ្លងការិយាល័យច្រើនដំណាក់កាលនិងសន្តិសុខដែលកាន់តែធ្វើឲ្យធ្លាក់ចុះធ្ងន់ធ្ងរចំពោះវិបត្តិមនុស្សធម៌ដែលមានស្រាប់រួចទៅហើយ។

លោក Fletcher បាននិយាយនៅទីក្រុងគែរ ប្រទេសអេហ្ស៊ីប មុនពេលដំណើរទស្សនកិច្ចដែលបានគ្រោងទុកទៅកាន់ព្រំដែនហ្កាហ្សាថា «វាគួរតែកើតឡើងនៅពេលនេះ។ យើងចង់ឱ្យវាកើតឡើងភ្លាមៗជាផ្នែកនៃកិច្ចព្រមព្រៀង»។

អគ្គលេខាធិការរងអង្គការសហប្រជាជាតិទទួលបន្ទុកកិច្ចការមនុស្សធម៌ និងជាអ្នកសម្របសម្រួលជំនួយសង្គ្រោះបាននិយាយថា ដំណើរការចូលត្រូវតែ «គ្មានការរារាំងទាំងស្រុង» ដើម្បីបំពេញទំហំតម្រូវការ ហើយប្រធានាធិបតីសហរដ្ឋអាមេរិក លោក Donald Trump និងមេដឹកនាំផ្សេងទៀត នៅក្នុងកិច្ចប្រជុំកំពូលទីក្រុង Sharm el-Sheikh នៅសប្តាហ៍នេះគឺ «ច្បាស់លាស់ណាស់ដែលយើងត្រូវបានអនុញ្ញាតឱ្យផ្តល់ជំនួយក្នុងទ្រង់ទ្រាយធំ»។

កាលពីថ្ងៃពុធ ទូរទស្សន៍រដ្ឋរបស់អ៊ីស្រាអែល Kan បានរាយការណ៍ថា ច្រកឆ្លងកាត់ទីក្រុង Rafah ជាមួយប្រទេសអេហ្ស៊ីបនឹងបើកឡើងវិញ ប៉ុន្តែវានៅតែបិទនៅពេលរសៀលម្សិលមិញ។

លោក Fletcher ត្រូវបានគេរំពឹងថានឹងទៅធ្វើដំណើរទៅពិនិត្យច្រកឆ្លងកាត់ទីក្រុង Rafah នៅថ្ងៃព្រហស្បតិ៍នេះ។ វាជាចំណុចព្រំដែនតែមួយគត់ដែលតភ្ជាប់តំបន់ហ្កាហ្សាទៅពិភពខាងក្រៅដែលមិនឆ្លងកាត់តាមអ៊ីស្រាអែល។