អស់រយៈពេល ៥ថ្ងៃបន្ទាប់ពីទឹកជំនន់ជាប្រវត្តិសាស្ត្រនៅម៉ិកស៊ិក ដែលសម្លាប់មនុស្សយ៉ាងតិច ៦៦នាក់ និងប៉ះពាល់ដល់មនុស្ស ១០ម៉ឺនគ្រួសារ អាជ្ញាធរកាលពីថ្ងៃពុធ (១៥ តុលា) នៅតែព្យាយាមជួយដល់សហគមន៍ដែលរងគ្រោះខ្លាំងបំផុត និងបន្តស្វែងរកមនុស្ស ៧៥នាក់ ដែលកំពុងបាត់ខ្លួន។

មហន្តរាយនេះគឺជាការសាកល្បងដ៏សំខាន់មួយសម្រាប់ប្រធានាធិបតីម៉ិកស៊ិក លោកស្រី Claudia Sheinbaum ដែលបានជួបប្រទះអរិភាពដ៏កម្រពីអ្នកស្រុក និងការព្រងើយកន្តើយពេលលោកស្រីធ្វើដំណើរទៅកាន់តំបន់រងផលប៉ះពាល់។ គ្រោះធម្មជាតិនេះបានចាប់ផ្តើមនៅពេលមានភ្លៀងធ្លាក់ខ្លាំងជាច្រើនថ្ងៃនៅតំបន់ភាគកណ្តាល និងភាគខាងកើតនៃប្រទេស ដោយបង្កបំណាក់ដី និងទឹកជំនន់ដែលបំផ្លិចបំផ្លាញយ៉ាងទូលំទូលាយ។

ភ្លៀងធ្លាក់ខ្លាំងនៅប្រទេសឈូងសមុទ្រមួយនេះ បានកើតឡើងនៅចុងរដូវវស្សាទៅហើយ ខណៈរដ្ឋរងផលប៉ះពាល់ខ្លាំងជាងគេគឺ Veracruz, Hidalgo និង San Luis Potosi ។ ទឹកជំនន់កើតឡើងដោយមិនបានព្រៀងទុកនោះទេ ដោយលោកស្រី Sheinbaum ប្រាប់អ្នកយកព័ត៌មានថា "មិនមានលក្ខខណ្ឌវិទ្យាសាស្ត្រ ឬឧតុនិយមដែលព្រមានអាជ្ញាធរជាមុនថា ទឹកភ្លៀងនឹងមានកម្រិតខ្លាំងក្លាបែបនេះឡើយ"។

ដោយមិនទទួលបានដំណឹងឧតុនិយមជាមុន ប្រជាពលរដ្ឋបានត្រឹមស្រែកព្រមានអ្នកជិតខាងដែលរស់នៅតាមមាត់ទន្លេ ហើយជម្លៀសខ្លួនរកទីសុវត្តិភាពពីទឹកជំនន់ដែលបានជន់លិច ៣០០សហគមន៍ ទាំងនៅភាគកណ្តាល និងភាគខាងកើតម៉ិកស៊ិក។ ទាហាន និងបុគ្គលិករាប់ពាន់នាក់បានចេញប្រតិបត្តិការដើម្បីជួយសង្គ្រោះជនស៊ីវិល និងសម្អាតកម្ទេចកម្ទីដើម្បីបណ្ដាញផ្លូវថ្នល់ដែលខូចខាតឡើងវិញ៕