ទីប្រឹក្សាជាន់ខ្ពស់សហរដ្ឋអាមេរិក ២រូបបាននិយាយកាលពីថ្ងៃពុធ (១៥ តុលា) ថា ផែនការកំពុងតែចាប់ផ្តើមរៀបចំឡើងសម្រាប់ការដាក់កងកម្លាំងអន្តរជាតិចូលទៅកាន់តំបន់ហ្កាហ្សា ដើម្បីរក្សាស្ថិរភាពសន្តិសុខនៅក្នុងតំបន់ប៉ាឡេស្ទីនមួយនេះ។

លក្ខខណ្ឌមួយក្នុងចំណោមចំណុចតម្រូវធំៗនៃផែនការសន្តិភាព ២០ចំណុច របស់លោកប្រធានាធិបតីអាមេរិក Donald Trump គឺការបង្កើតកងកម្លាំងរក្សាស្ថិរភាព ដែលគាំទ្រដោយសហរដ្ឋអាមេរិក។ សហរដ្ឋអាមេរិក បានយល់ព្រមផ្តល់ទាហានរហូតដល់ ២០០នាក់ ដើម្បីគាំទ្រកងកម្លាំងនោះ ប៉ុន្តែទាហានអាមេរិកទាំងនេះមិនត្រូវដាក់ពង្រាយដោយផ្ទាល់នៅហ្កាហ្សាឡើយ។

នៅក្នុងបទសម្ភាសន៍ខ្លីមួយឱ្យអ្នកសារព័ត៌មាន ប្រឹក្សាជាន់ខ្ពស់ទាំងពីររូបនោះបាននិយាយថា ភាពតានតឹងនៅតែមានកម្រិតខ្ពស់ខ្លាំងរវាងកងកម្លាំងអ៊ីស្រាអែល និងក្រុមសកម្មប្រយុទ្ធហាម៉ាស នៅក្នុងតំបន់ហ៊ុមព័ទ្ធនោះ ដោយបន្ថែមថា "ពេលនេះអ្វីដែលអាមេរិកចង់សម្រេចបាន គឺជាការរក្សាស្ថិរភាពជាមូលដ្ឋាននៃស្ថានការណ៍ ហើយកម្លាំងស្ថេរភាពអន្តរជាតិ កំពុងចាប់ផ្តើមរៀបចំឡើងហើយ"។

ទីប្រឹក្សាដែលសុំមិនបញ្ចេញឈ្មោះទាំងពីររូបនេះបន្តថា ក្នុងចំណោមប្រទេសដែលសហរដ្ឋអាមេរិកកំពុងពិភាក្សាពីការរួមចំណែកនៃកងកម្លាំង រួមមានឥណ្ឌូនេស៊ី អារ៉ាប់រួម អេហ្ស៊ីប កាតា និងអាស៊ែបៃហ្សង់។ មន្រ្តីសង្កត់ធ្ងន់ថា មានទាហានអាមេរិកនៅក្នុងតំបន់ស្រាប់ ដើម្បីជួយរៀបចំប្រតិបត្តិការនេះ ដោយបម្រើក្នុងតួនាទី "សម្របសម្រួល និងត្រួតពិនិត្យ"៕