លោកប្រធានាធិបតីអាមេរិក Donald Trump បាននិយាយកាលពីថ្ងៃពុធសប្ដាហ៍នេះថា លោក បានអនុញ្ញាតឲ្យទីភ្នាក់ងារ CIA ធ្វើប្រតិបត្តិការក្នុងប្រទេសវ៉េណេស៊ុយអេឡា ដើម្បីបង្ក្រាបលំហូរចូលខុសច្បាប់នៃជនអន្តោប្រវេសន៍ និងគ្រឿងញៀន ពីប្រទេសអាមេរិកខាងត្បូងមួយនេះ ។ 

ការអត្ថាធិប្បាយនេះគឺជាពាក្យសម្ដីដ៏ទូលំទូលាយបំផុតរបស់លោក Trump លើការសម្រេចចិត្តរបស់លោកក្នុងការពង្រីកសិទ្ធិអំណាចរបស់ CIA ដើម្បីធ្វើការកំណត់គោលដៅសំខាន់ៗ និងអនុវត្តសកម្មភាពសម្ងាត់ នៅក្នុងតំបន់ ដែល ទូរទស្សន៍ CNN បានរាយការណ៍ជាលើកដំបូងកាលពីសប្តាហ៍មុន។ 

ប្រភពបាននិយាយថា លោកប្រធានាធិបតី បានធ្វើបច្ចុប្បន្នភាពអាជ្ញាធររបស់ CIA ស្របពេលលោកបានចុះហត្ថលេខាលើសេចក្តីណែនាំសម្ងាត់មួយដែលបញ្ជាឱ្យយោធាចាប់ផ្តើមវាយប្រហារលើក្រុមជួញដូរគ្រឿងញៀន នៅអាមេរិកឡាទីន នៅដើមរដូវក្តៅនេះ។  

លោក Trump បានភ្ជាប់ការអនុញ្ញាតនេះទៅនឹងកិច្ចខិតខំប្រឹងប្រែងរបស់លោកដើម្បីតាមដានការរត់ពន្ធគ្រឿងញៀន។

លោក Trump បាននិយាយនៅក្នុងការិយាល័យ Oval Office ថា អាមេរិកមានរឿងញៀនជាច្រើនដែលហូរចូលមកពីប្រទេសវ៉េណេស៊ុយអេឡា ហើយគ្រឿងញៀនដ៏ច្រើនរបស់វ៉េណេស៊ុយអេឡា បានហូរចូលតាមសមុទ្រ ដូច្នេះអ្នកនឹងមើលឃើញ ប៉ុន្តែពួកលោកនឹងបញ្ឈប់ការហូរចូលតាមផ្លូវគោកផងដែរ៕