អង្គការគ្រូពេទ្យគ្មានព្រំដែន (MSF) ដែលជាក្រុមវេជ្ជសាស្រ្តសម្បុរសធម៌អន្តរជាតិ បាននិយាយកាលពីថ្ងៃពុធ (១៥ តុលា) ថា អំពើហិង្សាដែលនៅតែក្ដៅគគុកក្នុងរដ្ឋធានីប្រទេសហៃទី បានបង្ខំឱ្យខ្លួនបិទមជ្ឈមណ្ឌលថែទាំសង្គ្រោះបន្ទាន់នៅរដ្ឋធានីព័រអូប្រាំង "ជាអចិន្ត្រៃយ៍" ដែលជាខ្សែជីវិតដ៏សំខាន់ក្នុងទីក្រុងនេះ ដែលបច្ចុប្បន្ន ទឹកដី ៩០% នៃទីក្រុងត្រូវគ្រប់គ្រងដោយក្រុមជនអន្ធពាលទៅហើយ។

ជាង ៦០% នៃកន្លែងថែទាំសុខភាពរបស់រដ្ឋធានី រួមទាំងមន្ទីរពេទ្យធំរបស់ហៃទី ឥឡូវនេះត្រូវបិទទ្វារ ឬមិនដំណើរការទេ ដោយសារតែការកើនឡើងឥតឈប់ឈរនៃអំពើហិង្សារបស់ក្រុមប្រដាប់អាវុធអស់ជាច្រើនឆ្នាំ។ ទិន្នន័យអង្គការសហប្រជាជាតិនិយាយថា ចាប់តាំងពីខែមករា ដល់ខែមិថុនា ឆ្នាំនេះមក មនុស្សជាង ៣.១០០នាក់ត្រូវរាយការណ៍ថាបានស្លាប់ទូទាំងហៃទី និងប្រមាណ ១.១០០នាក់ទៀត ត្រូវរាយការណ៍ថារងរបួស ក្នុងអំពើហិង្សាក្រុមជនអន្ធពាល។

មជ្ឈមណ្ឌលសង្គ្រោះបន្ទាន់របស់អង្គការគ្រូពេទ្យគ្មានព្រំដែន នៅសង្កាត់ Turgeau ធ្លាប់បិទជាបណ្តោះអាសន្នក្នុងខែមីនា ឆ្នាំ២០២៥ បន្ទាប់ពីបុរសប្រដាប់អាវុធបើកការបាញ់ប្រហារលើរថយន្តចំនួន ៤គ្រឿងរបស់អង្គការនេះ ដែលកំពុងជម្លៀសបុគ្គលិកចេញពីមជ្ឈមណ្ឌល។

លោក Jean-Marc Biquet ប្រធានបេសកកម្មរបស់ MSF នៅហៃទី បាននិយាយថា "អគារនេះត្រូវវាយប្រហារជាច្រើនដងមកហើយ ដោយសារទីតាំងរបស់អគារនៅជិតតំបន់ប្រយុទ្ធខ្លាំងពេក ដែលនឹងធ្វើឱ្យសកម្មភាពនៅទីនោះមិនអាចទៅរួចទេ ព្រោះគ្រោះថ្នាក់ខ្លាំងទាំងអ្នកជំងឺ និងបុគ្គលិក"៕