សម្ដេចតេជោ ហ៊ុន សែន នាយករដ្ឋមន្ត្រីថ្លែងអំណរគុណចំពោះឯកឧត្តមប្រធានាធិបតីអាមេរិក ដែលបានផ្ញើលិខិតបញ្ជាក់អំពីគោលបំណងអញ្ជើញសម្ដេច និងថ្នាក់ដឹកនាំអាស៊ាន ចូលរួមកិច្ចប្រជុំកំពូលពិសេស អាស៊ាន-អាមេរិក ដែលគ្រោងរៀបចំនៅក្នុងរយៈពេលប៉ុន្មានខែខាងមុខនេះ និងបំណងប្រាថ្នាក្នុងការពង្រឹងទំនាក់ទំនងអាស៊ាន-អាមេរិកបន្ថែមទៀត ក្នុងពេលកម្ពុជាធ្វើជាប្រធានអាស៊ាន។នេះបានតាមលិខិតសម្តេចតេជោ ផ្ញើតបទៅកាន់ប្រធានាធិបតីសហរដ្ឋអាមេរិក លោក ចូ បៃដិន។

ក្នុងនាមកម្ពុជាជាប្រធានអាស៊ានឆ្នាំ២០២២ សម្ដេចតេជោបញ្ជាក់សារជាថ្មី អំពីការប្ដេជ្ញានិងការគាំទ្រយ៉ាងពេញទំហឹង ចំពោះសហរដ្ឋអាមេរិកក្នុងការរៀបចំកិច្ចប្រជុំកំពូលពិសេស អាស៊ាន-អាមេរិក នៅរដ្ឋធានីវ៉ាស៊ីនតោន។

សម្ដេចតេជោមានជំនឿថា កិច្ចប្រជុំកំពូលនេះនឹងផ្ដល់នូវកាលានុវត្តភាពល្អមួយសម្រាប់យើង ផ្លាស់ប្ដូរយោបល់គ្នា ថាតើត្រូវធ្វើយ៉ាងណាដើម្បីឲ្យកិច្ចសហប្រតិបត្តិការអាស៊ាន-អាមេរិករីកចម្រើនទៅមុខបន្ថែមទៀត។

សម្តេចតេជោក៏បញ្ជាក់ដែរថា សម្ដេចទន្ទឹងរង់ចាំធ្វើការយ៉ាងជិតស្និទ្ធជាមួយឯកឧត្តម ចូ បៃឌិន និងជួបជាមួយឯកឧត្តមផ្ទាល់នៅរដ្ឋធានីវ៉ាស៊ីនតោន៕