ទីភ្នាក់ងារជំនួយស្បៀងអាហាររបស់អង្គការសហប្រជាជាតិ UN បាននិយាយកាលពីថ្ងៃពុធ (១៥ តុលា) ថា ការកាត់បន្ថយមូលនិធិយ៉ាងច្រើនពីម្ចាស់ជំនួយចម្បងៗរបស់ខ្លួន កំពុងធ្វើឱ្យប៉ះពាល់ដល់ប្រតិបត្តិការក្នុងប្រទេសចំនួន៦ ទូទាំងពិភពលោក ហើយបានព្រមានថា មនុស្សជិត ១៤លាននាក់ បន្ថែមទៀតអាចត្រូវបង្ខំឱ្យធ្លាក់ក្នុងភាពអត់ឃ្លានកម្រិតគ្រាអាសន្ន។

កម្មវិធីស្បៀងអាហារពិភពលោក WFP ដែលជាធម្មតាទទួលបានមូលនិធិច្រើនបំផុតរបស់ចំណោមស្ថាប័នទាំងអស់របស់ UN បាននិយាយនៅក្នុងរបាយការណ៍ថ្មីមួយថា ការផ្តល់មូលនិធិរបស់ខ្លួននៅឆ្នាំនេះ "ជួបបញ្ហាប្រឈមមិនធ្លាប់មានពីមុនមក" ភាគច្រើនដោយសារតែការកាត់បន្ថយចំណាយពីសហរដ្ឋអាមេរិក ក្រោមរដ្ឋបាលថ្មី និងម្ចាស់ជំនួយលោកខាងលិចឈានមុខគេផ្សេងទៀត។

WFP ព្រមានថា មនុស្ស ១៣,៧លាននាក់ នៃអ្នកទទួលជំនួយអាហាររបស់ខ្លួនទាំងអស់ អាចត្រូវបង្ខំឱ្យអត់ឃ្លានយ៉ាងមហន្តរាយ នៅពេលមូលនិធិកាត់បន្ថយ។ ប្រទេសដែលប្រឈមនឹង "ការរំខានដ៏ធំបំផុត" គឺអាហ្វហ្គានីស្ថាន កុងហ្គោ ហៃទី សូម៉ាលី ស៊ូដង់ខាងត្បូង និងស៊ូដង់។

នាយកប្រតិបត្តិ WFP លោកស្រី Cindy McCain បាននិយាយថា "គ្រប់គ្នាកំពុងឈរមើលខ្សែជីវិតរបស់មនុស្សរាប់លាននាក់ ត្រូវរលត់បាត់នៅចំពោះមុខ"។ ទីភ្នាក់ងារស្បៀងរបស់ UN មួយនេះសង្កត់ធ្ងន់ថា ខ្លួនរំពឹងថានឹងទទួលបានមូលនិធិតិចជាងមុន ៤០% នៅឆ្នាំនេះ ប្រហែល ៦,៤ពាន់លានដុល្លារ ខណៈកាលពីឆ្នាំ២០២៤ ទទួលបានប្រមាណ ១០ពាន់លានដុល្លារ៕