ប្រធានាធិបតីអាមេរិក លោក Donald Trump បាននិយាយថា លោកមើលឃើញថា សហរដ្ឋអាមេរិកកំពុងជាប់ក្នុងសង្គ្រាមពាណិជ្ជកម្មជាមួយប្រទេសចិន បើទោះបីរដ្ឋមន្ត្រីក្រសួងរតនាគារ លោក Scott Bessent បានលើកឡើងពីការផ្អាកដំឡើងពន្ធខ្ពស់ លើទំនិញរបស់ចិន ដើម្បីដោះស្រាយជម្លោះ ពាក់ព័ន្ធនឹងរ៉ែសំខាន់ៗក៏ដោយ។

កាលពីថ្ងៃពុធ (ទី ១៥ ខែតុលា) នៅពេលអ្នកសារព័ត៌មានសួរថា តើប្រទេសដែលមានសេដ្ឋកិច្ចធំជាងគេបំផុតទាំង២ កំពុងស្ថិតក្នុងការមានសង្គ្រាមពាណិជ្ជកម្មមែនទេ ប្រសិនបើភាគីទាំង២ មិនអាចឈានដល់កិច្ចព្រមព្រៀងពាណិជ្ជកម្មនោះ លោក Trump បានឆ្លើយតបថា៖ «មែន វាកើតមានឥឡូវនេះ។ យើងដាក់អត្រាពន្ធ ១០០ភាគរយ។ ប្រសិនបើយើងមិនមានការដំឡើងពន្ធ យើងនឹងត្រូវបានបង្ហាញថា មិនមានឥទ្ធិពលអ្វីសោះ»។

គួរបញ្ជាក់ថា លោក Trump បាននិយាយបែបនេះត្រឹមតែប៉ុន្មានម៉ោងប៉ុណ្ណោះបន្ទាប់ពីលោក Bessent បានបង្ហើបពីលទ្ធភាពពន្យារនូវការផ្អាកពន្ធនាំចូលលើទំនិញរបស់ចិនរយៈពេលជាង ៣ខែ ប្រសិនបើទីក្រុងប៉េកាំងបញ្ឈប់ផែនការរបស់ខ្លួន ពាក់ព័ន្ធនឹងការត្រួតពិនិត្យការនាំចេញថ្មីដ៏តឹងរ៉ឹងលើរ៉ែកម្រ។ សហរដ្ឋអាមេរិក និងចិនបានព្រមព្រៀងផ្អាកជម្លោះជាបន្តបន្ទាប់រយៈពេល ៩០ថ្ងៃ ចាប់តាំងពីដើមឆ្នាំ២០២៥ មក ដោយពេលវេលាកំណត់បន្ទាប់ នឹងមកដល់ក្នុងខែវិច្ឆិកា។

យ៉ាងណាក្ដី ការលើកឡើងបញ្ច្រាសគ្នានេះ បានគូសបញ្ជាក់ថា វិនិយោគិនមានអារម្មណ៍មិននឹងនរ ខណៈភាពតានតឹង បានឡើងកម្ដៅកាន់តែខ្លាំងភ្លាមៗ ក្នុងទំនាក់ទំនង រវាងក្រុងវ៉ាស៊ីនតោន និងប៉េកាំង។ ភាគហ៊ុនអាមេរិក បានបន្តកើនឡើង បន្ទាប់ពីមានការអត្ថាធិប្បាយរបស់លោក Bessent ខណៈពេលដែលការកត់សម្គាល់របស់លោក Trump បានកើតឡើងបន្ទាប់ពីការជួញដូរត្រូវបានបិទនៅទីក្រុងញូវយ៉ក។

ច្បាប់ថ្មីរបស់ចិន ដែលបានប្រកាសកាលពីសប្តាហ៍មុន តម្រូវឲ្យក្រុមហ៊ុនក្រៅប្រទេសទទួលបានការអនុញ្ញាតពីរដ្ឋាភិបាលចិនសិន មុនពេលនាំចេញផលិតផល សូម្បីបរិមាណតិចតួចនៃរ៉ែកម្រដែលមានប្រភពនៅចិន។ លោក Trump បានឆ្លើយតបដោយការគំរាមថា នឹងដាក់ពន្ធបន្ថែម ១០០ភាគរយលើទំនិញចិន ត្រឹមថ្ងៃទី១ ខែវិច្ឆិកា។ លោកបានលើកឡើងពីគំនិតនៃការលុបចោលគម្រោងមានកិច្ចប្រជុំ ជាមួយប្រធានាធិបតីចិន លោក Xi Jinping ហើយបានព្រមានថា សហរដ្ឋអាមេរិកអាចបញ្ឈប់ពាណិជ្ជកម្មប្រេងឆា៕