គណបក្សប្រជាធិបតេយ្យសេរី (LDP) ដែលកំពុងថមថយឥទ្ធិពលរបស់ប្រទេសជប៉ុន គ្រោងចាប់ផ្តើមកិច្ចពិភាក្សាគោលនយោបាយ នៅថ្ងៃព្រហស្បតិ៍ (ទី១៦ ខែតុលា) នេះ ជាមួយគណបក្សនវានុវត្តន៍ជប៉ុន (JIP) ខណៈដែលលោកស្រី Sanae Takaichi ដែលជាមេដឹកនាំថ្មីរបស់គណបក្សកាន់អំណាច ប្រឹងប្រែងបញ្ចុះបញ្ចូលសម្ព័ន្ធមិត្ត ដើម្បីទទួលបានសំឡេងឆ្នោតគាំទ្រគ្រប់គ្រាន់ សម្រាប់តំណែងនាយករដ្ឋមន្ត្រី ដែលរំពឹងកើតមាននៅសប្តាហ៍ក្រោយ។

ភាគហ៊ុន Nikkei បានហក់ឡើង នៅពេលដែលការរំពឹងទុកហាក់ដូចជាមានពន្លឺ ដែលលោកស្រី Takaichi អាចក្លាយជានាយករដ្ឋមន្ត្រីស្ត្រីដំបូងគេរបស់ជប៉ុន ដោយបង្កឲ្យមានលទ្ធភាពរស់ឡើងវិញនូវការចំណាយដ៏ធំ និងសម្រាលនូវគោលនយោបាយរូបិយវត្ថុ។

គួរបញ្ជាក់ថា មាគ៌ារបស់លោកស្រី Takaichi ក្នុងការឆ្ពោះទៅស្នងតំណែងនាយករដ្ឋមន្ត្រី លោក Shigeru Ishiba ហាក់បីដូចជាស្ទើរតែប្រាកដប្រជា រហូតទាល់តែដៃគូរបស់បក្ស LDP គឺគណបក្សដ៏តូច Komeito ដកខ្លួនចេញពីសម្ព័ន្ធភាពរយៈពេល ២៦ឆ្នាំរបស់ពួកគេ កាលពីសប្តាហ៍មុន ដោយចាប់ផ្តើមចរចារជាមួយក្រុមគូប្រជែងជាបន្តបន្ទាប់ ដើម្បីជ្រើសរើសនាយករដ្ឋមន្ត្រីបន្ទាប់។

សហប្រធានបក្ស JIP លោក Fumitake Fujita បានប្រាប់អ្នកសារព័ត៌មានថា៖ «មានទស្សនៈរឹងមាំ (ក្នុងចំណោមសមាជិកបក្ស) ដែលថា យើងគួរតែទទួលបានការធានានូវគោលនយោបាយជាច្រើន ដែលយើងបានប្តេជ្ញាចិត្តតាមដែលអាចធ្វើទៅបាន បន្ទាប់មកបង្កើតរដ្ឋាភិបាលចម្រុះ និងផ្លាស់ប្តូរនយោបាយជប៉ុន»។

ប្រសិនបើមានការចូលរួមជាមួយគ្នា គណបក្សទាំង២ នឹងខ្វះតែ ២អាសនៈប៉ុណ្ណោះនៃសំឡេងភាគច្រើន នៅក្នុងសភាជាន់ទាបដែលនឹងមានការបោះឆ្នោតសម្រេចជ្រើសរើសនាយករដ្ឋមន្ត្រី។ រដ្ឋាភិបាលមិនទាន់ឯកភាពលើកាលបរិច្ឆេទនៅឡើយទេ សម្រាប់ការបោះឆ្នោតសភានេះ៕