ក្រុមគ្រួសារនៃជនរងគ្រោះ ក្នុងគ្រោះថ្នាក់ធ្លាក់យន្តហោះរបស់ក្រុមហ៊ុនអាកាសចរណ៍ Jeju Air កំពុងស្វែងរកសំណងពីក្រុមហ៊ុន Boeing នៅក្នុងតុលាការសហរដ្ឋអាមេរិក ដោយចោទប្រកាន់ថា កំហុសឆ្គងផ្នែកផលិតបណ្តាលឲ្យមានឧបទ្ទវហេតុដែលបានសម្លាប់មនុស្ស ១៧៩នាក់ កាលពីខែធ្នូឆ្នាំមុន។

ក្រុមហ៊ុន Herman Lawgroup មូលដ្ឋាននៅសហរដ្ឋអាមេរិក ដែលតំណាងឲ្យ ១៤គ្រួសារ បានដាក់ពាក្យបណ្តឹងប្ដឹងក្រុមហ៊ុន Boeing នៅឯតុលាការជាន់ខ្ពស់នៃតំបន់ King County ក្នុងទីក្រុង Seattle រដ្ឋ Washington។ ក្រុមហ៊ុន Wisner Law Firm ដែលតំណាងឲ្យក្រុមគ្រួសារជនរងគ្រោះដែរនោះ បានប្តឹងក្រុមហ៊ុនផលិតយន្តហោះអាមេរិកមួយនេះ នៅក្នុងតុលាការរដ្ឋ Illinois។ បណ្តឹងនេះផ្តោតលើប្រព័ន្ធអគ្គិសនី និងលំហូរទឹកហួសសម័យ ដែលត្រូវបានជឿថា បង្កបញ្ហាដល់ការចុះចត។

លោក Charles Herrmann ដែលជាមេធាវីនាំមុខគេ ក្នុងសំណុំរឿងនៅទីក្រុង Seattle ត្រូវបានដកស្រង់សម្តីដោយប្រព័ន្ធផ្សព្វផ្សាយរបស់សហរដ្ឋអាមេរិក ដែលបាននិយាយថា ក្រុមហ៊ុន Boeing «បែរជាស្ដីបន្ទោសដល់បច្ចេកទេសរបស់អ្នកបើកយន្តហោះ» ជាជាងទទួលស្គាល់នូវកំហុសឆ្គងនៃប្រព័ន្ធចាស់របស់ខ្លួន។

គួររំលឹកថា ឧបទ្ទវហេតុជើងហោះហើរលេខ 7C 2216 របស់ក្រុមហ៊ុន Jeju Air បានកើតឡើងកាលពីថ្ងៃទី២៩ ខែធ្នូ ឆ្នាំ២០២៤ នៅអាកាសយានដ្ឋានអន្តរជាតិ Muan ក្នុងខេត្ត South Jeolla។ យន្តហោះនោះបានចុះលើផ្លូវរត់ដោយមិនបានទម្លាក់កង់ចុះចត ដោយសារមូលហេតុដែលមិនទាន់អាចបញ្ជាក់បាន ដោយបានរត់ទៅបុកបង្គោលបេតុង ហើយបណ្តាលឲ្យផ្ទុះ។ មនុស្សទាំងអស់ លើកលែង ២នាក់ នៅលើយន្តហោះនោះ បាត់បង់ជីវិត៕