នាយករដ្ឋមន្រ្តីបារាំង លោក Sebastien Lecornu ទំនងជានឹងរួចផុតពីការបោះឆ្នោតដកសេចក្ដីទុកចិត្តចំនួន២ នៅក្នុងសភា នាថ្ងៃព្រហស្បតិ៍ (ទី១៦ ខែតុលា) បន្ទាប់ពីបានស្នើផ្ដល់នូវការផ្អាកកំណែទម្រង់សោធននិវត្តន៍ដ៏សំខាន់របស់ប្រធានាធិបតី លោក Emmanuel Macron ក្នុងគោលបំណងទទួលបានការគាំទ្រពីក្រុមឆ្វេងនិយម។

លោក Lecornu ដែលជានាយករដ្ឋមន្ត្រីកាន់តំណែងរយៈពេលខ្លីបំផុតរបស់ប្រទេសបារាំង នៅក្នុងសម័យទំនើប មុនពេលរូបលោកត្រូវបានតែងតាំងឡើងវិញកាលពីសប្តាហ៍មុន បានប្រឈមនឹងការរំពឹងទុកនៃការមានអាណត្តិទី២ ខ្លីជាងមុន រហូតដល់លោកបានធ្វើសម្បទានកំណែទម្រង់ប្រាក់សោធននិវត្តន៍ កាលពីថ្ងៃទី១៤ ខែតុលា។

គណបក្សសង្គមនិយម ដែលការគាំទ្ររបស់ខ្លួន ជាគន្លឹះដល់ការរស់រាននយោបាយរបស់លោក Lecornu បានស្វាគមន៍ចំពោះចំណាត់ការនេះ ដោយនិយាយថា ពួកគេនឹងមិនគាំទ្រញត្តិដកទុកចិត្តចំនួន២ ដែលនឹងត្រូវបោះឆ្នោតនៅថ្ងៃទី១៦ ខែតុលានេះទេ ដោយញត្តិមួយរបស់ក្រុមឆ្វេងនិយមជ្រុល និងមួយទៀតមកពីការក្រុមស្តាំនិយមជ្រុល គឺគណបក្ស National Rally (NR)។

ទោះបីជាមានការស្នើផ្តល់ជូនរបស់លោក Lecornu ក្នុងការធ្វើកំណែទម្រង់ រហូតដល់ក្រោយការបោះឆ្នោតប្រធានាធិបតីឆ្នាំ២០២៧ ក៏ដោយ ក៏លទ្ធផលត្រូវបានគេរំពឹងថា នឹងមានការប្រកៀកប្រកិតគ្នា ដោយក្រុមជំទាស់នាពេលខាងមុខ ពីគណបក្សសង្គមនិយម ឬគណបក្សសាធារណរដ្ឋអភិរក្សនិយម បានបញ្ចូលវិធានការដែលនាំឲ្យលទ្ធផលមិនច្បាស់លាស់។

មានសមាជិកសភា ២៦៥នាក់ នៅក្នុងសភាមកពីគណបក្សនានា ដែលបានបញ្ជាក់ថា ពួកគេនឹងបោះឆ្នោតផ្តួលរំលំលោក Lecornu ដោយត្រូវការតែ ២៨៩សំឡេងប៉ុណ្ណោះ ដើម្បីទម្លាក់រូបលោក។ លោក Lecornu បានប្រាប់សមាជិកសភាកាលពីថ្ងៃទី១៥ ខែតុលាថា លោកនឹងស្នើនៅក្នុងខែវិច្ឆិកា នូវវិសោធនកម្មច្បាប់ ស្តីពីហិរញ្ញវត្ថុសន្តិសុខសង្គម ដើម្បីផ្អាកកំណែទម្រង់៕