រដ្ឋមន្រ្តីការបរទេសប៉ូឡូញលោក Radoslaw Sikorski បានព្រមានថា អឺរ៉ុបត្រូវតែត្រៀមខ្លួនសម្រាប់ការវាយប្រហារកាន់តែជ្រៅរបស់រុស្ស៊ីចូលទៅក្នុងតំបន់ ដោយរូបលោកចាត់ទុកថា វាគឺជារឿងគ្មានទំនួលខុសត្រូវ បើមិនសាងសង់ប្រព័ន្ធការពារដូចជាជញ្ជាំងដ្រូននៅតំបន់ចុងបូព៌ារបស់ខ្លួនទេនោះ ។

ក្នុងព្រឹត្តការណ៍នៅទីក្រុងឡុងដ្រ៍ រៀបចំឡើងដោយអង្គការរួបរួមប្រឆាំងនុយក្លេអ៊ែរអ៊ីរ៉ង់(UANI) ដែលមើលឃើញបង្ហាញយានដ្រូនអ៊ីរ៉ង់ Shahed-136 ធ្លាក់នៅអ៊ុយក្រែន លោក Sikorski បានជំរុញឲ្យបណ្តាប្រទេសអឺរ៉ុប បន្តការគាំទ្រអ៊ុយក្រែន ហើយលោកសង្ឃឹមថា ប្រធានាធិបតីសហរដ្ឋអាមេរិកលោក Donald Trump នឹងផ្តល់មីស៊ីលរយៈចម្ងាយឆ្ងាយ Tomahawk ដល់ប្រទេសមួយនេះ ដើម្បីពង្រឹងការវាយប្រហាររបស់ពួកគេលើហេដ្ឋារចនាសម្ព័ន្ធរបស់រុស្ស៊ី ។

លោកនិយាយថា ការផ្តល់ឲ្យអ៊ុយក្រែននូវអាវុធបន្ថែមទៀត ដូចជាអាវុធប្រឆាំងយន្តហោះ អាវុធរយៈចម្ងាយជិត និងរយៈចម្ងាយឆ្ងាយ គឺចាំបាច់ដើម្បីការពារអឺរ៉ុប ដោយរូបលោកលើកជាឧទាហរណ៍នការឈ្លានពានយានដ្រូនលើដែនអាកាសប៉ូឡូញ និងយន្តហោះចម្បាំងលើដែនអាកាសប្រទេសអេស្តូនី ។

នៅពេលសួរពីលទ្ធភាពនៃការបង្កើនគំនិតផ្តួចផ្តើមសម្រាប់ជញ្ជាំងដ្រូន ដើម្បីប្រឆាំងការឈ្លានពាននាពេលអនាគត លោក Sikorski និយាយថា រុស្ស៊ីអាចនឹងវាយប្រហារចូលកាន់តែជ្រៅនៅអឺរ៉ុប ។

លោកនិយាយថា ពួកយើងត្រូវតែត្រៀមខ្លួន ដើម្បីប្រឆាំងនឹងវា ហើយលោកគិតថា ការពុំបង្កើតសមត្ថភាពយានដ្រូន និងសមត្ថភាពប្រឆាំងយានដ្រូននៅថ្ងៃនេះ វាគឺជារឿងមិនទទួលខុសត្រូវនោះទេ ៕