​​ប៉ូឡូញ៖ សារព័ត៌មាន Reuters បាន​និយាយថា យន្តហោះ​ដឹក​កងទ័ព​អាមេរិក​បាន​ចុះចត​នៅក្នុង​ប្រទេស​ប៉ូឡូញកាលពី​ថ្ងៃអាទិត្យ ខណៈ​ទីក្រុង Washington ពង្រឹងកម្លាំង​សម្ព័ន្ធមិត្ត​ណា​តូរបស់​ខ្លួន​នៅក្នុង​អឺរ៉ុប​ខាងកើត ស្របពេល​រុស្ស៊ី​បង្កើន​កម្លាំង​កងទ័ព​នៅ​តាម​ព្រំដែន​អ៊ុយ​ក្រែ​ន​។ ​លោក​ប្រធានាធិបតី​អាមេរិក Joe Biden កាលពី​ថ្ងៃ​ពុធបាន​បញ្ជា​ឲ្យ​បញ្ជូន​កងទ័ព​ជិត ៣ពាន់​នាក់បន្ថែម​ទៀតទៅកាន់​ប្រទេស​ប៉ូឡូញ និង​រ៉ូ​ម៉ា​នី ខណៈដែល​ទីក្រុង Washington ព្យាយាម​ធានា​ជាថ្មី​ដល់​សម្ព័ន្ធមិត្ត​អង្គការ​ណា​តូ។

​មន្ទីរ​បញ្ច​កោណបាន​និយាយថា កងទ័ព​ប្រមាណ ១,៧០០​នាក់​ដែល​ភាគច្រើន​មកពី​កងពលធំ​លេខ ៨២ ​របស់​អាកាស​អាមេរិក ​(82nd Airborne Division) នឹង​ដាក់​បញ្ជូន​ពី​ទីក្រុង Fort Bragg រដ្ឋ North Carolina ទៅកាន់​ប្រទេស​ប៉ូឡូញ​។ ការ​មក​ដល់​កាលពី​ថ្ងៃអាទិត្យ​នៃ​យន្តហោះ C-17 បាន​ធ្វើឡើង​បន្ទាប់ពី​យន្តហោះ​ដែល​ដឹក​មេបញ្ជាការ​កងពលធំ​លេខ ៨២ របស់​អាកាស​អាមេរិក ឧត្តមសេនីយ Christopher Donahue ដែល​បាន​ចុះចត​កាលពី​ថ្ងៃ​សៅរ៍​នៅ​អាកាសយានដ្ឋាន Rzeszow-Jasionka និង​យន្តហោះ​ពីរ​-​បី​គ្រឿង​ជាមួយ​យោទ្ធោបករណ៍​អាមេរិក និងក្រុម​ជំនាញ​។

​យោង​តាម​គេហទំព័រ​កងកម្លាំង​អាកាស​សហរដ្ឋអាមេរិកគេ​មិន​ច្បាស់​ទេ​ថា ​តើ​មាន​កងទ័ព​ប៉ុន្មាន​នាក់​បាន​ទៅដល់ ប៉ុន្តែ​យន្តហោះ C-17 ត្រូវបាន​ប្រើ​ដើម្បី​ដឹកជញ្ជូន​កងពល​ទ័ព​ប៉ា​រ៉ា ១០២​ និង​យោ​ទ្ធោ​បក​រណ៍​របស់​ពួកគេ​។ ​លោក​ Christopher Donahue បា​និយាយថា ជំនួយ​ខាង​កងទ័ព​នៅទីនេះគឺ​ដើម្បី​បង្ហាញ​ពី​សាមគ្គីភាព​របស់​យើង ទៅដល់​សម្ព័ន្ធមិត្ត​រប​ស់​យើងនៅ​អឺរ៉ុប ហើយ​អំឡុងពេល​មាន​ភាពមិនច្បាស់លាស់​នេះ យើង​បានដឹងថា យើង​កាន់តែ​រឹងមាំ​ជាមួយគ្នា៕

អត្ថបទ៖ សុខមាន