យោងតាមសេចក្តីថ្លែងការណ៍របស់ក្រសួងការបរទេស នៅថ្ងៃព្រហស្បតិ៍ (ទី១៦ ខែតុលា) នេះ បានឲ្យដឹងថា ប្រទេសចិនបានបង្ហាញពីឆន្ទៈ ក្នុងការពង្រឹងការផ្លាស់ប្តូរកម្រិតខ្ពស់ជាមួយប្រទេសបារាំង នៅក្នុងកិច្ចសន្ទនាជាយុទ្ធសាស្ត្រ រវាងរដ្ឋមន្ត្រីការបរទេសចិនលោក Wang Yi និងទីប្រឹក្សាការទូតប្រធានាធិបតីបារាំង។

សេចក្តីថ្លែងការណ៍ បានឲ្យដឹងថា នៅក្នុងកិច្ចប្រជុំមួយ កាលពីថ្ងៃទី១៥ ខែតុលា លោក Wang បានប្រាប់ទីប្រឹក្សាប្រធានាធិបតីបារាំង លោក Emmanuel Bonne ថា ប្រទេសចិនត្រៀមខ្លួនជាស្រេច ក្នុងការធ្វើឲ្យកាន់តែស៊ីជម្រៅនូវទំនុកចិត្តទៅវិញទៅមកជាយុទ្ធសាស្រ្ត និងលើកកម្ពស់កិច្ចសហប្រតិបត្តិការគ្រប់វិស័យ។

សេចក្តីថ្លែងការណ៍របស់ក្រសួងការបរទេសចិន បានបន្ថែមដោយមិនបានបញ្ជាក់លម្អិតថា លោក Wang បានសង្កត់ធ្ងន់ថា ប្រទេសចិន សង្ឃឹមថា ប្រទេសបារាំងនឹង «ផ្តល់នូវការធានាផ្នែកនយោបាយដ៏រឹងមាំ សម្រាប់ទំនាក់ទំនងទ្វេភាគី»។

ជាមួយគ្នានេះ លោកក៏បានលើកឡើងផងដែរថា ថាមពលនុយក្លេអ៊ែរស៊ីវិល លំហអាកាស កសិកម្ម និងអាហារ បញ្ញាសិប្បនិម្មិត (AI) និងថាមពលថ្មី គឺជាវិស័យសម្រាប់ការធ្វើកិច្ចសហប្រតិបត្តិការបន្ថែមទៀត។

សេចក្តីថ្លែងការណ៍បានឲ្យដឹងបន្ថែមថា ឥស្សរជនទាំង២ ក៏បានពិភាក្សាផងដែរ អំពីវិបត្តិអ៊ុយក្រែន ស្ថានភាពនៅតំបន់មជ្ឈិមបូព៌ា និងប្រព័ន្ធអភិបាលកិច្ចសកល ដោយភាគីទាំង២ បានយល់ព្រមបន្តរក្សាទំនាក់ទំនងដែលមានការសម្របសម្រួល៕