អ៊ីស្រាអែល នៅថ្ងៃព្រហស្បតិ៍ (ទី១៦ ខែតុលា) នេះ បានឲ្យដឹងថា ខ្លួនកំពុងរៀបចំសម្រាប់ការបើកឡើងវិញនូវច្រកឆ្លងកាត់ Rafah រវាងតំបន់ហ្កាហ្សា និងប្រទេសអេហ្ស៊ីប ដើម្បីអនុញ្ញាតប្រជាជនប៉ាឡេស្ទីនចេញ-ចូល ប៉ុន្តែមិនទាន់កំណត់កាលបរិច្ឆេទនៅឡើយទេ ខណៈដែលបានចោទដាក់គ្នាទៅវិញទៅមកជាមួយក្រុមហាម៉ាស ជុំវិញការរំលោភលើបទឈប់បាញ់ដែលសម្របសម្រួលដោយសហរដ្ឋអាមេរិក។

ជម្លោះ អំពីការប្រគល់ត្រឡប់វិញនូវសាកសពចំណាប់ថ្នូរដែលត្រូវបានឃុំខ្លួនដោយក្រុមហាម៉ាស នៅតំបន់ហ្កាហ្សា នៅតែបន្តមានសក្តានុពលធ្វើឲ្យបទឈប់បាញ់ប្រែប្រួល រួមជាមួយនឹងផែនការសំខាន់ៗជាច្រើនផ្សេងទៀតដែលមិនទាន់ត្រូវបានដោះស្រាយ ដែលរួមមានទាំងការរំសាយអាវុធរបស់ពួកសកម្មប្រយុទ្ធ និងអភិបាលកិច្ចរបស់តំបន់ហ្កាហ្សា នាពេលអនាគត។

អ៊ីស្រាអែលបានទាមទារឲ្យក្រុមហាម៉ាសបំពេញកាតព្វកិច្ចរបស់ខ្លួន ក្នុងការបញ្ជូនត្រឡប់នូវសាកសពចំណាប់ថ្នូរទាំង ២៨នាក់ដែលបានស្លាប់អំឡុងសង្គ្រាមនេះ។ ក្រុមឥស្លាមនិយមមួយនេះ បានប្រាប់ថា ខ្លួនបានប្រគល់សាកសពចំនួន ១០នាក់ហើយ ប៉ុន្តែអ៊ីស្រាអែលបានបញ្ជាក់ថា ម្នាក់ក្នុងចំណោមសាកសពទាំងនោះ មិនមែនជាចំណាប់ថ្នូរនោះទេ។

អ្នកនាំពាក្យរដ្ឋាភិបាលអ៊ីស្រាអែលបាននិយាយកាលពីថ្ងៃទី១៥ ខែតុលាថា៖ «យើងនឹងមិនសម្របសម្រួល ចំពោះរឿងនេះទេ ហើយយើងនឹងមិនបញ្ឈប់កិច្ចប្រឹងប្រែង រហូតដល់ចំណាប់ថ្នូរដែលបានស្លាប់របស់យើងត្រឡប់មកវិញ»។

អង្គភាពប្រដាប់អាវុធរបស់ក្រុមហាម៉ាស បានបញ្ជាក់ថា ការប្រគល់សាកសពបន្ថែមទៀត នៅតំបន់ហ្កាហ្សា ដែលត្រូវបានបំផ្លិចបំផ្លាញឲ្យក្លាយទៅជាបំណែកកម្ទេចថ្មដ៏ធំសម្បើមដោយសង្រ្គាម នឹងតម្រូវឲ្យមានការអនុញ្ញាតឲ្យគ្រឿងចក្រធុនធ្ងន់ និងឧបករណ៍ជីកកកាយចូលទៅក្នុងដែនដីប៉ាឡេស្ទីនដែលត្រូវបានបិទខ្ទប់ដោយអ៊ីស្រាអែល។

នៅថ្ងៃទី១៦ ខែតុលានេះ មន្ត្រីជាន់ខ្ពស់របស់ក្រុមហាម៉ាស បានចោទប្រកាន់អ៊ីស្រាអែលថា បានរំលោភបទឈប់បាញ់ ដោយបានសម្លាប់មនុស្សយ៉ាងហោចណាស់ ២៤នាក់ នៅក្នុងការបាញ់ប្រហារ ចាប់តាំងពីថ្ងៃទី១០ ខែតុលា ហើយបាននិយាយថា បញ្ជីកត់ត្រាពីការរំលោភបែបនេះ ត្រូវបានប្រគល់ទៅឲ្យអ្នកសម្របសម្រួល៕