គណៈកម្មការអឺរ៉ុប កំពុងពិភាក្សា ដើម្បីអនុម័តគំនិតផ្តួចផ្តើមប្រឆាំងយានដ្រូនថ្មី ដើម្បីការពារដែនអាកាសសហភាពអឺរ៉ុបពីការបំពានរបស់រុស្ស៊ី ស្របពេលដែលពួកគេព្យាយាមពង្រឹងសន្តិសុខព្រំដែនជាមួយបច្ចេកវិទ្យាយានដ្រូនដ៏ជឿនលឿនផ្ទាល់ខ្លួន បន្ទាប់ពីការឈ្លានពានយានដ្រូនជាបន្តបន្ទាប់ ត្រូវបានរាយការណ៍នៅក្នុងប្រទេសធ្វើម្ចាស់ផ្ទះសហភាពអឺរ៉ុប និងជាប្រទេសសមាជិកអង្គការណាតូ កាលពីខែកន្លងទៅ ។

សំណើរួមបញ្ចូលផែនទីផ្លូវគោលនយោបាយការពារជាតិដែលត្រូវបង្ហាញនៅថ្ងៃព្រហស្បតិ៍នេះ មានគោលបំណងសម្រាប់សមត្ថភាពប្រឆាំងយានដ្រូនថ្មី ដើម្បីឈានដល់សមត្ថភាពដំបូងនៅដំណាច់ឆ្នាំក្រោយ ហើយនិងក្លាយជាប្រតិបត្តិការពេញលេញនៅដំណាច់ឆ្នាំ ២០២៧ ។ នេះបើយោងតាមសេចក្តីស្នើឯកសារ ។

ឯកសារនេះ នឹងត្រូវបង្ហាញជូនប្រធានកិច្ចការបរទេសរបស់សហភាពអឺរ៉ុបលោកស្រី Kaja Kallas អនុប្រធានប្រតិបត្តិគណៈកម្មការអឺរ៉ុបទទួលបន្ទុកសន្តិសុខលោកស្រី Henna Virkkunen និងស្នងការអឺរ៉ុបទទួលបន្ទុកការពារជាតិលោក Andrius Kubilius ។

សូមបញ្ជាក់ថា ប្រធានគណៈកម្មការអឺរ៉ុបលោកស្រី Ursula von der Leyen បាននិយាយកាលពីខែមុនថា វាដល់ពេលដែលអឺរ៉ុបត្រូវបង្កើតជញ្ជាំងដ្រូន ដើម្បីការពារចុងបូព៌ាអឺរ៉ុប រយៈពេលប៉ុន្មានម៉ោងប៉ុណ្ណោះ ក្រោយយានដ្រូនរុស្ស៊ីប្រហែល ២០គ្រឿង ត្រូវបានគេរាយការណ៍ថា បានហោះចូលដែនអាកាសប្រទេសប៉ូឡូញដែលជាសមាជិករបស់សហភាពអឺរ៉ុប និងអង្គការណាតូ ៕