ជនប៉ាឡេស្ទីននៅទីក្រុង Khan Younis តំបន់ហ្កាហ្សាស្រ្ទីប និយាយនៅថ្ងៃព្រហស្បតិ៍នេះថា បច្ចុប្បន្នពួកគេប្រឈមបញ្ហាពិតនៃការជម្លៀសខ្លួន ក្រោយបទឈប់បាញ់រវាងអ៊ីស្រាអែល និងក្រុមាហាម៉ាស បានចូលជាធរមានកាលពីសប្តាហ៍មុន ។

លោក Adel al-Semairy គឺជាជនប៉ាឡេស្ទីនជម្លៀសខ្លួនមួយរូបនិយាយថា លោកមានជំនឿថា បញ្ហាពិតបានចាប់ផ្តើមក្រោយសង្រ្គាម ពីព្រោះថា នៅថ្ងៃនេះ ការរងគ្រោះរបស់ពួកយើង បានកើនឡើង ។ 

លោកថា ពួកយើងបានរង់ចាំជំនួយ ប៉ុន្តែគ្មានជំនួយបានមកដល់នោះទេ ពីព្រោះថាមាននូវបញ្ហាភស្តុភារ ។ ទឹក និងគ្រឿងចក្រដែលពួកគេនិយាយថា នឹងចូលតំបន់ហ្កាហ្សា ដើម្បីបោសសម្អាតកម្ទេចកម្ទី ពុំបានចូលនោះទេ ។

លោក Adel បន្តថា បន្ទាប់ពីអ្វីដែលពួកយើងបានឮកាលពីថ្ងៃម្សិលមិញពីការគំរាមកំហែងនឹងកើតឡើង ពួកយើងពិតជាមានការព្រួយបារម្ភខ្លាំងណាស់ថា បទឈប់បាញ់អាចនឹងត្រូវដួលរលំនៅពេលណាមួយ ។ ម្សិលមិញ ពលរដ្ឋនិយាយថា រដ្ឋាភិបាលអ៊ីស្រាអែលនឹងចាប់ផ្តើមសង្រ្គាមឡើងវិញនៅហ្កាហ្សា ពេលដែលពលរដ្ឋឮបែបនេះ ពួកគេហត់នឿយខ្លាំងណាស់ ពួកគេលែងមានកម្លាំងកំហែងអ្វីទៀតហើយ ។

សង្រ្គាមបណ្តាលឲ្យកើតមានគ្រោះថ្នាក់មនុស្សធម៌នៅតំបន់ហ្កាហ្សា ក្នុងនោះពលរដ្ឋជិតទាំងអស់ បានបង្ខំចាកចេញពីផ្ទះសម្បែងរបស់ពួកគេ ខណៈក្រុមតាមដានភាពអត់ឃ្លានសកលលោក បញ្ជាក់ពីគ្រោះទុរ្ភិក្ស ។

មុននេះអ៊ីស្រាអែលព្រមានថា ពួកគេអាចបន្តបិទច្រកព្រំដែន Rafah និងកាត់បន្ថយជំនួយចូលដែនដីប៉ាឡេស្ទីនមួយនេះ ពេលដែលក្រុមហាម៉ាស ប្រគល់សាកសពចំណាប់ថ្នូរស្លាប់យឺតយ៉ាវខ្លាំងពេក ជាហេតុធ្វើឲ្យអន្តរាយដល់ហានិភ័យនៃបទឈប់បាញ់ដែលបានផ្អាកសង្រ្គាមខ្ទេចខ្ទាំរយៈពេល ២ និងមើលឃើញចំណាប់ថ្នូររស់ទាំងអស់ដែលត្រូវបានឃាត់ទុកដោយក្រុមហាម៉ាស ត្រូវបានដោះលែង ។

ទោះបីជាយ៉ាងណាក៏ដោយ ប្រភពព័ត៌មានចំនួន ២ បាននិយាយប្រាប់ទីភ្នាក់ងារព័ត៌មានរ៉យទ័រកាលពីថ្ងៃពុធថា ច្រកព្រំដែន Rafah ត្រូវបានគេរំពឹងថានឹងបើក សម្រាប់ពលរដ្ឋនៅថ្ងៃព្រហស្បតិ៍ ៕