ការរញ្ជួយដីកម្រិត ៦,១រ៉ិចទ័រ បានវាយប្រហារប្រទេសហ្វីលីពីនភាគខាងត្បូង នៅព្រឹកថ្ងៃសុក្រ ១៧ តុលានេះ មួយសប្តាហ៍បន្ទាប់ពីការរញ្ជួយដីដ៏ខ្លាំងក្លាចំនួនពីរលើកបានវាយប្រហារប្រទេសនេះ។

អ្នកជួយសង្គ្រោះបានប្រាប់ទីភ្នាក់ងារសារព័ត៌មាន AFP ថា ពុំមានរបាយការណ៍ភ្លាមៗបញ្ជាក់ពីអ្នកស្លាប់ របួស ឬការខូចខាតនោះទេ។

អ្នកជួយសង្គ្រោះខាងលើបាននិយាយថា ពួកគេមានអារម្មណ៍រញ្ជួយខ្លាំងភ្លាមៗ តែមានរយៈពេលខ្លីប៉ុណ្ណោះ ។

មជ្ឈមណ្ឌលស្ទង់ភូគព្ភសាស្ត្រអាមេរិក USGS បានរាយការណ៍ថា ការរញ្ជួយនេះបានវាយប្រហារនៅជិតក្រុង Dapa ក្នុងខេត្ត Surigao del Norte ក្នុងជម្រៅប្រហែល៦៩ គីឡូម៉ែត្រ។

គ្រោះរញ្ជួយដីនេះ បានកើតឡើងមួយសប្តាហ៍បន្ទាប់ពីការរញ្ជួយដីពីរកម្រិត៧,៤ និង៦,៧ រ៉ិចទ័រ បានអង្រួនផ្នែកខាងកើតនៃកោះមីនដាណាវ ដ៏សំខាន់ដោយបានសម្លាប់មនុស្សយ៉ាងហោចណាស់ប្រាំបីនាក់។  

ទាំងនេះបន្ទាប់ពីគ្រោះរញ្ជួយដីកម្រិត ៦.៩ រ៉ិចទ័រកាលពីប៉ុន្មានថ្ងៃមុន ដែលបានសម្លាប់មនុស្ស ៧៦ នាក់ និងបំផ្លាញ ឬខូចខាតផ្ទះសម្បែងចំនួន ៧២.០០០ ខ្នងនៅក្នុងខេត្ត Cebu ភាគកណ្តាលប្រទេសហ្វីលីពីន នេះបើយោងតាមតួលេខរបស់រដ្ឋាភិបាល៕