ប្រទេសចិន កាលពីថ្ងៃព្រហស្បតិ៍ (១៦ តុលា) បានចោទសហរដ្ឋអាមេរិក ថាបំភ័យពិភពលោក ចំពោះការគ្រប់គ្រងរ៉ែកម្ររបស់ទីក្រុងប៉េកាំង ហើយនិយាយថា លោក Scott Bessent រដ្ឋមន្រ្តីក្រសួងរតនាគារអាមេរិក បានធ្វើសុន្ទរកថា "ខុសទាំងស្រុង" អំពីប្រមុខអ្នកចរចាពាណិជ្ជកម្មចិន ដោយបដិសេធការអំពាវនាវរបស់សេតវិមាន ឱ្យលុបចោលការទប់ស្កាត់រ៉ែកម្រនេះ។

កាសែតផ្លូវការរបស់បក្សកុម្មុយនិស្តចិន ក៏បានចេញ "អត្ថបទបដិសេធ ៧ចំណុច" ផងដែរ បន្ទាប់ពីប្រមុខចរចារបស់អាមេរិករូបនេះបានលើកឡើងថា ទីក្រុងប៉េកាំងអាចទប់ស្កាត់ការគំរាមដាក់ពន្ធ ១០០% លើទំនិញចិន របស់លោកប្រធានាធិបតី Donald Trump បាន ដោយការលុបចោលវិធានការរិតត្បិតរ៉ែកម្ររបស់ខ្លួន ដែលកំណត់ចូលជាធរមាននៅថ្ងៃទី៨ ខែវិច្ឆិកា ខាងមុខ។

លោកស្រី He Yongqian អ្នកនាំពាក្យក្រសួងពាណិជ្ជកម្មចិន បានប្រាប់សន្និសីទសារព័ត៌មានមួយថា "ការបកស្រាយរបស់អាមេរិកលើរឿងនេះ ខុសឆ្គងទាំងស្រុង និងបំផ្លើសយ៉ាងធ្ងន់ធ្ងរលើវិធានការគ្រប់គ្រងការនាំចេញរ៉ែកម្ររបស់ចិន ដោយមានចេតនាបង្កការយល់ច្រឡំ និងភាពភ័យស្លន់ស្លោ ដែលមិនចាំបាច់"។ លោកស្រីបន្ថែមថា “គ្រាន់តែស្នើសុំអាជ្ញាបណ្ណនាំចេញដោយអនុលោមតាមច្បាប់ និងបង្ហាញបំណងសម្រាប់ការប្រើប្រាស់ស៊ីវិលមក នោះរ៉ែកម្រនឹងត្រូវអនុម័តឱ្យនាំចេញហើយ”។ កាសែតផ្លូវការរបស់បក្សកុម្មុយនិស្តចិន បាននិយាយថា "ការត្រួតពិនិត្យនាំចេញរ៉ែ គឺស្របនឹងការអនុវត្តអន្តរជាតិ" ដោយបញ្ជាក់ឡើងវិញពីជំហរទីក្រុងប៉េកាំងចំពោះវិធានការនេះ ចាប់តាំងពីការប្រកាសមក។

គួរឱ្យដឹងថា ចិនបានពង្រីកការគ្រប់គ្រងនាំចេញរ៉ែកម្ររបស់ខ្លួន ដោយបន្ថែមធាតុថ្មី ៥ប្រភេទ និងការត្រួតពិនិត្យបន្ថែមលើអ្នកប្រើប្រាស់បន្ទះឈីប ខណៈទីក្រុងប៉េកាំងរឹតបន្តឹងលើវិស័យនេះ មុនពេលលទ្ធភាពនៃកិច្ចពិភាក្សារវាងលោក Trump និងមេដឹកនាំចិន លោក Xi Jinping នៅកូរ៉េខាងត្បូង ចុងខែតុលា។ ការរឹតបន្តឹងនេះនឹងចូលជាធរមាននៅថ្ងៃទី៨ ខែវិច្ឆិកា មុនពេលកិច្ចព្រមព្រៀងពន្ធបណ្ដោះអាសន្ន ៩០ថ្ងៃជាមួយទីក្រុងវ៉ាស៊ីនតោន ផុតកំណត់៕