​បាល់ទាត់​៖ ក្រុមបាល់ទាត់​ស្ត្រី​ចិន​បាន​ក្លាយជា​ជើង​ឯក នៃ​ការប្រកួត​ពានរង្វាន់​បាល់ទាត់​ស្ត្រី​ជើងឯក​អាស៊ី AFC Women Asian Cup 2022 ក្រោយ​យកឈ្នះ​ក្រុម​ស្ត្រី​កូរ៉េខាងត្បូង​នៅ​វគ្គ​ផ្តាច់ព្រ័ត្រ​។ ​​ក្រុម​ស្ត្រី​ចិន​បាន​ពន្លាត​កំណត់ត្រា ​ជា​ក្រុម​ដែល​ឈ្នះ​ជើងឯក​អាស៊ី​ច្រើនជាងគេ​ឡើងដល់ ៩លើក​បន្ទាប់ពី​ការ​វាយបក​យកឈ្នះ​នៅ​ថ្ងៃអាទិត្យ​ម្សិលមិញ​នៅ​ទីក្រុង Mumbai ប្រទេស​ឥណ្ឌា​។

​​កីឡាការិនី​កូរ៉េ Choe Yu-ri និង Ji So-yun រកបាន​ម្នាក់​មួយគ្រា​ប់​នៅ​នាទី​ទី២៧ និង ៤៥+៣ ឱ្យ​កូរ៉េ​នាំមុខ​មុន​ដល់​ទៅ ២គ្រាប់​ក្នុង​វគ្គ​ទី១​។ ​​តែ​នៅ​វគ្គ​ទី២ គឺជា​រឿង​ផ្សេង ក្រុម​ស្ត្រី​ចិន​ដែលមាន​បទពិសោធ​នៅ​វគ្គ​ផ្តាច់ព្រ័ត្រ និង​ជា​ក្រុម​ឈ្នះ​ជើងឯក​ច្រើនជាងគេ​នោះបាន​វាយបក​តាម​ស្មើ​វិញ​ដោយ​កីឡាការិនី Tan Jiali នាទី​ទី៦៨ បាល់​ពិន័យ ១១ម៉ែត្រ និង​កីឡាការិនី Zhang Linyan នាទី​ទី៧២​។ ​​មិនតែប៉ុណ្ណោះ​ការប្រកួត​ហៀបនឹង​បញ្ចប់​ទៅហើយ ពោលគឺ​នាទី​ទី៩០+៣ ចិន​ថែមទាំង​រកបាន​គ្រាប់​ជ័យជំនះ​ដោយ​កីឡាការិនី Xiao Yuyi​។

​​សូមបញ្ជាក់ថា តាំងពី​បង្កើតឡើង​នៃ​ការប្រកួត​បាល់ទាត់​ស្ត្រី​ជើងឯក​អាស៊ី​រយៈពេល ៤៧ឆ្នាំកន្លងមក​ក្រុមបាល់ទាត់​ស្ត្រី​ចិន​បានឈ្នះ​ជើង​ឯក ៩លើក​ទាំង​លើក​នេះ និង​ឡើង​វគ្គ​ផ្តាច់ព្រ័ត្រ​សរុប ១១លើក​។ ​​ចំណែក​បន្ទាប់ពី​ចិន នៅ​អាស៊ី​មានតែ​កូរ៉េខាងជើង និង​ឆាយ​នី​ស​តៃប៉ិ​ដែល​ធ្លាប់​ឈ្នះ​ជើងឯក ៣លើក​ដូចគ្នា​ ខណៈជប៉ុន​ឈ្នះ ២លើក​៕

​អត្ថបទ​៖​នាង សុភា​វុ​ធ