ប្រធានាធិបតីអ៊ុយក្រែនលោក Volodymyr Zelenskyy បាននិយាយថា កិច្ចប្រជុំនានៅថ្ងៃសុក្រនេះរវាងលោកជាមួយប្រធានាធិបតីអាមេរិក Donald Trump អាចជំរុញយ៉ាងខ្លាំងដល់កិច្ចខិតខំប្រឹងប្រែងដើម្បីបញ្ចប់សង្រ្គាមជាមួយរុស្ស៊ី។    

លោក Zelenskyy បានទៅដល់សហរដ្ឋអាមេរិកកាលពីថ្ងៃព្រហស្បតិ៍ ដើម្បីស្វែងរកជំនួយផ្នែកយោធាបន្ថែម រួមទាំងមីស៊ីលវាយប្រហាររយៈចម្ងាយឆ្ងាយ មុនពេលកិច្ចពិភាក្សារបស់លោកជាមួយ Trump ដែលគ្រោងធ្វើនៅថ្ងៃសុក្រនេះ។ 

លោកបានបញ្ជាក់ថា អ៊ុយក្រែនមានការត្រៀមលក្ខណៈយ៉ាងទូលំទូលាយរួចរាល់សម្រាប់កិច្ចប្រជុំថ្ងៃទី ១៧ ខែតុលា ដែលនឹងពិភាក្សាទាំងការគាំទ្រផ្នែកយោធា និងកិច្ចសហប្រតិបត្តិការសេដ្ឋកិច្ចរវាងទីក្រុង គីវ និងទីក្រុងវ៉ាស៊ីនតោន។

លោក Zelenskyy បាននិយាយថា ពួកលោកបានរៀបចំផ្នែកនៃកិច្ចការផ្ទះ (homework) រួចហើយ មុនពេលកិច្ចប្រជុំជាមួយប្រធានាធិបតី Trump ទាំងផ្នែកយោធា និងផ្នែកសេដ្ឋកិច្ច។ រាល់ព័ត៌មានលម្អិត អ្វីគ្រប់យ៉ាងគឺរួចរាល់ហើយ។របៀបវារៈនៃកិច្ចប្រជុំរបស់លោកជាមួយប្រធានាធិបតីសហរដ្ឋអាមេរិក មានសារៈសំខាន់ណាស់។ 

មេដឹកនាំអ៊ុយក្រែនបានសម្តែងការដឹងគុណចំពោះអ្នកដែលពាក់ព័ន្ធក្នុងការរៀបចំ និងបានសង្កត់ធ្ងន់លើសក្តានុពលនៃផលប៉ះពាល់ជាសកលនៃការដឹកនាំរបស់សហរដ្ឋអាមេរិកក្នុងការដោះស្រាយជម្លោះដែលបានបន្តអស់រយៈពេលជិត៤ ឆ្នាំ៕