ប្រធានាធិបតីសហរដ្ឋអាមេរិក លោក Donald Trump បានគំរាមបំពានបទឈប់បាញ់រវាងអ៊ីស្រាអែល និងក្រុមហាម៉ាស ប្រសិនបើក្រុមប៉ាឡេស្ទីនមួយនេះ បន្តកំណត់គោលដៅលើក្រុមជនអន្ធពាល និងចោទប្រកាន់អ្នកសហការអ៊ីស្រាអែលនៅក្នុងតំបន់ហ្កាហ្សា។

លោក Trump បានសរសេរនៅក្នុងការបង្ហោះលើបណ្តាញផ្សព្វផ្សាយសង្គមកាលពីថ្ងៃព្រហស្បតិ៍ថា «ប្រសិនបើក្រុមហាម៉ាសនៅតែបន្តសម្លាប់ប្រជាជននៅតំបន់ហ្កាហ្សាដែលពុំមែនជាកិច្ចព្រមព្រៀង នោះយើងនឹងគ្មានជម្រើសអ្វីក្រៅពីចូលទៅសម្លាប់ក្រុមនេះឡើយ»។

សេចក្តីថ្លែងការណ៍នេះ ទំនងជាបង្ហាញពីការប្រឈមមុខដាក់គ្នាពីលោក Trump ដែលកាលពីដើមសប្តាហ៍នេះបានបង្ហាញការគាំទ្រចំពោះការបង្រ្កាបរបស់ក្រុមហាម៉ាសលើក្រុមជនអន្ធពាលនៅក្នុងដែនដីប៉ាឡេស្ទីន។ មានការប៉ះទង្គិចគ្នាយ៉ាងបង្ហូរឈាមដែលត្រូវបានរាយការណ៍រវាងក្រុមហាម៉ាស និងសមាជិកក្រុមប្រដាប់អាវុធនៅតំបន់ហ្កាហ្សាដែលក្រុមនេះត្រូវបានគេចោទប្រកាន់ថាបានចូលលួចជំនួយមនុស្សធម៌ និងធ្វើការឱ្យអ៊ីស្រាអែល។

បន្ទាប់ពីការប្រយុទ្ធគ្នាកាលពីថ្ងៃអាទិត្យកន្លងទៅនេះ អាជ្ញាធរតំបន់ហ្កាហ្សាបានចេញការលើកលែងទោសជាទូទៅសម្រាប់សមាជិកក្រុមជនអន្ធពាលដែលមិនចូលរួមក្នុងការបង្ហូរឈាម។

កាលពីខែមិថុនា មន្ត្រីអ៊ីស្រាអែលបានសារភាពថា ខ្លួនបានផ្តល់អាវុធដល់ក្រុមជនអន្ធពាលនៅតំបន់ហ្កាហ្សា ដែលមួយចំនួនមានទំនាក់ទំនងជាមួយក្រុមអាយស៊ីស(ISIS) ក្នុងកិច្ចខិតខំប្រឹងប្រែងដើម្បីធ្វើឱ្យមានអស្ថិរភាពដល់ក្រុមហាម៉ាស។