ប្រតិបត្តិករបណ្តាញអគ្គិសនីជាតិបាននិយាយថា ប្រទេសអ៊ុយក្រែនបានកាត់ផ្តាច់ចរន្តអគ្គិសនីរយៈពេលពីរថ្ងៃជាប់ៗគ្នាកាលពីថ្ងៃព្រហស្បតិ៍ ទី១៦ ខែតុលា ខណៈរុស្ស៊ីបានបង្កើនការវាយប្រហារលើបណ្តាញថាមពលរបស់ប្រទេសនេះក្នុងពេលមានសីតុណ្ហភាពធ្លាក់ចុះ។

កងកម្លាំងរុស្ស៊ី បានវាយប្រហារទៅលើទីតាំងឧស្ម័ននៅភាគខាងកើតអ៊ុយក្រែន បណ្តាលឱ្យមានការបង្អាក់យ៉ាងទូលំទូលាយជាអ្វីដែលទីក្រុងគីវ បានពិពណ៌នាថាជាការទម្លាក់គ្រាប់បែកក្នុងរដូវរងារទ្រង់ទ្រាយធំចុងក្រោយរបស់ទីក្រុងមូស្គូលើហេដ្ឋារចនាសម្ព័ន្ធថាមពលរបស់ខ្លួន។

ប្រតិបត្តិករអគ្គិសនីរដ្ឋ Ukrenergo បាននិយាយថា «ដោយសារតែស្ថានភាពលំបាកនៅក្នុងប្រព័ន្ធថាមពល ការកាត់ផ្តាច់ចរន្តអគ្គិសនីបន្ទាន់ត្រូវបានអនុវត្តនៅគ្រប់តំបន់របស់អ៊ុយក្រែន»។ ការកាត់ផ្តាច់នេះធ្វើឡើងដើម្បីបែងចែកចរន្តអគ្គិសនី ដោយអាជ្ញាធរជំរុញឲ្យពលរដ្ឋកាត់បន្ថយការប្រើប្រាស់។

អ្នកសារព័ត៌មាននៅទីក្រុង Kharkiv បាននិយាយថា តំបន់ជាច្រើនបានធ្លាក់ចូលទៅក្នុងភាពងងឹត ដោយនៅតាមហាងនានាដំណើរការដោយម៉ាស៊ីនភ្លើង។

កងទ័ពរុស្ស៊ីនិយាយថា ខ្លួនបានចាប់ផ្តើម «ការវាយប្រហារទ្រង់ទ្រាយធំ» ប្រើប្រាស់មីស៊ីលបាលីស្ទីក និងយានដ្រូន លើទីតាំងឧស្ម័នរបស់អ៊ុយក្រែន។ កងទ័ពអាកាសរបស់អ៊ុយក្រែនបាននិយាយថា យានដ្រូនចំនួន៣២០គ្រឿង និងមីស៊ីល៣៧គ្រាប់ត្រូវបានបាញ់បង្ហោះនៅពេលយប់ ដោយយានដ្រូន២៨៣គ្រឿង និងមីស៊ីល៥គ្រាប់ ត្រូវបានស្ទាក់ចាប់។