រុស្ស៊ី៖ ក្រសួងការពារជាតិរុស្ស៊ីបានចេញផ្សាយវីដេអូកាលពីថ្ងៃអាទិត្យ នៃកងកម្លាំងប្រដាប់អាវុធមកពីតំបន់យោធាភាគខាងលិច ដែលកំពុងធ្វើសមយុទ្ធនៅក្នុងតំបន់ Leningrad ជាប់ព្រំដែនប្រទេសហ្វាំងឡង់ និងអេស្តូនី។ ក្រសួងការពារជាតិបាននិយាយថា បុគ្គលិកអាកាសចរណ៍ផ្នែកដឹកជញ្ជូនបានអនុវត្តការហោះហើរហ្វឹកហាត់។
កាលពីថ្ងៃសៅរ៍ ប្រទេសរុស្ស៊ីបានបញ្ជូនយន្តហោះទម្លាក់គ្រាប់បែក ដែលមានសមត្ថភាពផ្ទុកនុយក្លេអ៊ែររយៈចម្ងាយឆ្ងាយពីរគ្រឿង ទៅល្បាតនៅលើប្រទេសបេឡារុសដែលមានព្រំប្រទល់ជាប់ប្រទេសអ៊ុយក្រែន។ សមយុទ្ធកាលពីចុងសប្តាហ៍កន្លងទៅនេះ បានធ្វើឡើងនៅពេលដែលវិមានក្រឹមឡាំងបានផ្លាស់ប្តូរកងទ័ពពីតំបន់ស៊ីបេរី និងចុងបូព៌ាទៅកាន់ប្រទេសបេឡារុស្សសម្រាប់សមយុទ្ធរួមគ្នា។ ការដាក់ពង្រាយនេះបានបន្ថែមទៅលើការបង្កើនយោធារុស្ស៊ីនៅជិតប្រទេសអ៊ុយក្រែន ដែលជំរុញឱ្យមានការព្រួយបារម្ភរបស់ប្រទេសលោកខាងលិច ចំពោះការឈ្លានពានដែលអាចកើតមាន។ ប្រទេសរុស្ស៊ីបានបដិសេធផែនការវាយប្រហារប្រទេសជិតខាងអ៊ុយក្រែន ប៉ុន្តែបានជំរុញឱ្យសហរដ្ឋអាមេរិក និងសម្ព័ន្ធមិត្តផ្តល់ការសន្យាថា ពួកគេមិនទទួលយកអ៊ុយក្រែនចូលទៅក្នុងអង្គការណាតូ ឬដាក់ពង្រាយអាវុធវាយប្រហារ និងដកការដាក់ពង្រាយកងទ័ពសម្ព័ន្ធមិត្តទៅអឺរ៉ុបខាងកើតវិញ។ ទោះជាយ៉ាងណាទីក្រុងវ៉ាស៊ីនតោន និងអង្គការណាតូបានច្រានចោលការទាមទារនេះ។
ប្រទេសលោកខាងលិចបានអំពាវនាវឱ្យប្រទេសរុស្ស៊ីដកកងទ័ពប្រមាណ ១០ម៉ឺននាក់ត្រឡប់ទៅវិញពីតំបន់ក្បែរប្រទេសអ៊ុយក្រែន ប៉ុន្តែវិមានក្រឹមឡាំងបានឆ្លើយតបដោយនិយាយថា ប្រទេសរុស្សីនឹងដាក់កងទ័ពនៅទីកន្លែងណាដែលខ្លួនត្រូវការឲ្យនៅលើទឹកដីប្រទេសរុស្ស៊ី។ ខណៈភាពតានតឹងលើប្រទេសអ៊ុយក្រែនកើនឡើង យោធារុស្ស៊ីបានចាប់ផ្តើមហ្គេមសង្គ្រាមជាបន្តបន្ទាប់ដែលចាប់ផ្តើមពីតំបន់អាក់ទិកទៅកាន់សមុទ្រខ្មៅ។ ការដាក់ពង្រាយកងទ័ពរុស្ស៊ីទៅកាន់ប្រទេសបេឡារុស្ស បានបង្កើនការព្រួយបារម្ភរបស់ប្រទេសលោកខាងលិច ដែលទីក្រុងម៉ូស្គូអាចធ្វើការវាយប្រហារលើប្រទេសអ៊ុយក្រែនពីភាគខាងជើង។ រដ្ឋធានីប្រទេសអ៊ុយក្រែនមានចម្ងាយត្រឹមតែ ៧៥គីឡូម៉ែត្រពីព្រំដែនជាមួយប្រទេសបេឡារុស្ស៕
អត្ថបទ៖ ប៊ុនថន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
