សារព័ត៌មានក្យូដូ បានរាយការណ៍នៅថ្ងៃសុក្រ (១៧ តុលា) នេះថា គណបក្សនយោបាយធំបំផុតចំនួនពីររបស់ប្រទេសជប៉ុន គឺគណបក្សប្រជាធិបតេយ្យសេរីនិយម (LDP) និងគណបក្សប្រជាធិបតេយ្យធម្មនុញ្ញ (CDP) បានឈានដល់កិច្ចព្រមព្រៀងដ៏ទូលំទូលាយមួយនៃការបោះឆ្នោតសភា ដើម្បីជ្រើសរើសនាយករដ្ឋមន្ត្រីបន្ទាប់ នៅថ្ងៃអង្គារ ទី២១ ខែតុលា សប្ដាហ៍ក្រោយនេះ។ គណៈកម្មាធិការរៀបចំកាលវិភាគនៃសភាជាន់ទាបរបស់ជប៉ុន ក៏បានបញ្ជាក់ពីការព្រមព្រៀងលើកាលបរិច្ឆេទនេះដែរ។

បក្ស LDP បានរើសលោកស្រី Sanae Takaichi ជាមេដឹកនាំថ្មីរបស់ខ្លួនកាលពីដើមខែនេះ បន្ទាប់ពីលោកនាយករដ្ឋមន្ត្រី Shigeru Ishiba បានសម្រេចលាលែងពីតំណែង ទាំងជាប្រធានបក្ស និងជានាយករដ្ឋមន្ត្រី។ យ៉ាងណាមិញ ផ្លូវរបស់លោកស្រី Takaichi ដើម្បីក្លាយជានាយករដ្ឋមន្ត្រីស្ត្រីដំបូងគេរបស់ជប៉ុន កាន់តែស្រពេចស្រពិល បន្ទាប់ពីដៃគូដ៏យូរលង់របស់ខ្លួនគឺបក្ស Komeito បានចាកចេញពីក្រុមចម្រុះ ដោយបើកលទ្ធភាពឱ្យក្រុមប្រឆាំងលើតំណែងកំពូលមួយនេះ។

បេក្ខជនណាដែលបានសំឡេងគាំទ្រភាគច្រើនក្នុងការបោះឆ្នោតជុំទីមួយនឹងឈ្នះការអនុម័ត ប៉ុន្តែបើមិនដូច្នោះទេ បេក្ខភាពពីររូបណាដែលមានសំឡេងច្រើនជាងគេ នឹងឈានទៅវគ្គជម្រុះមួយតង់ទៀត។ លោកស្រី Takaichi បានពិភាក្សាពីលទ្ធភាពបង្កើតក្រុមចម្រុះរវាងបក្ស LDP ជាមួយមេដឹកនាំបក្សនវានុវត្តន៍និយមស្តាំនិយម ក្នុងបំណងដណ្តើមសំឡេងគាំទ្រ ក្នុងការបោះឆ្នោតសប្តាហ៍ក្រោយ។ ប៉ុន្តែទោះជាបក្សទាំងពីរនេះរួមគ្នាក៏ដោយ ក៏នឹងនៅតែខ្វះពីរអាសនៈទៀតនៃសំឡេងភាគច្រើនដែលត្រូវការក្នុងសភាជាន់ទាប ខណៈសភានេះជាវេទិកាសម្រេចអ្នកឈ្នះតំណែងនាយករដ្ឋមន្ត្រី៕