ប្រទេសមហាអំណាចលោកខាងលិចកាលពីថ្ងៃព្រហស្បតិ៍ ទី១៦ ខែតុលា បានជំរុញឲ្យមានកិច្ចខិតខំប្រឹងប្រែងដើម្បីកាត់ផ្តាច់ប្រាក់ចំណូលប្រេងរបស់រុស្ស៊ី ដោយលោកប្រធានាធិបតី Donald Trump បានអះអាងថា ឥណ្ឌាបានសន្យាបញ្ឈប់ការទិញប្រេង ហើយចក្រភពអង់គ្លេសបានបង្ហាញពីការដាក់ទណ្ឌកម្មថ្មីលើក្រុមហ៊ុនថាមពលរុស្ស៊ី និងចិន។

លោក Trump បាននិយាយថានាយករដ្ឋមន្រ្តីឥណ្ឌា លោក Narendra Modi បានធានាដល់លោកថាឥណ្ឌា «នឹងមិនទិញប្រេងពីរុស្ស៊ីទៀតទេ» ដោយបានចាត់ទុកថាជា «ជំហានដ៏ធំ» និងបាននិយាយបន្ថែមថា «ពេលនេះយើងនឹងឱ្យប្រទេសចិនធ្វើដូចគ្នានេះ»។ ទោះជាយ៉ាងណា ក្រសួងការបរទេសឥណ្ឌាបាននិយាយថា ខ្លួនពុំបានដឹងពីការអំពាវនាវបែបនេះទេ។

ខណៈប្រទេសឥណ្ឌាបានបដិសេធពីការប្តេជ្ញាចិត្តយ៉ាងច្បាស់លាស់ក្នុងការបញ្ឈប់ការនាំចូលប្រេងឆៅពីរុស្ស៊ី ប្រភពចំនួនបីដែលដឹងពីការពិភាក្សារបស់រដ្ឋាភិបាលបាននិយាយថាក្រុមហ៊ុនចម្រាញ់ប្រេងរបស់ឥណ្ឌាកំពុងត្រៀមកាត់បន្ថយការទិញប្រេងដោយចាប់ផ្តើមពីខែធ្នូ ទោះបីជាពុំមានការណែនាំផ្លូវការណាមួយត្រូវបានចេញក៏ដោយ។

បច្ចុប្បន្នរុស្ស៊ីផ្គត់ផ្គង់ប្រហែល ៣៦ ភាគរយនៃប្រេងឆៅរបស់ប្រទេសឥណ្ឌា ឬប្រហែល ១,៧៥ លានបារ៉ែលក្នុងមួយថ្ងៃ។ ដោយអឺរ៉ុបភាគច្រើនបានកាត់ផ្តាច់ប្រេងពីរុស្ស៊ី ប្រទេសឥណ្ឌានិងចិនបានក្លាយជាអ្នកទិញដ៏សំខាន់ក្នុងតម្លៃដែលត្រូវបានបញ្ចុះ។