ទីប្រឹក្សាសន្តិសុខជាតិរបស់កូរ៉េខាងត្បូង លោក Wi Sung-lac Wi បាននិយាយកាលពីថ្ងៃព្រហស្បតិ៍ (១៦ តុលា) ថា ប្រធានាធិបតីសហរដ្ឋអាមេរិក លោក Donald Trump នឹងទៅកាន់កូរ៉េខាងត្បូង នៅថ្ងៃទី២៩ ខែតុលា ខាងមុខ សម្រាប់ដំណើរទស្សនកិច្ចរយៈពេលពីរថ្ងៃ ដើម្បីចូលរួមកិច្ចប្រជុំកំពូលនៃកិច្ចសហប្រតិបត្តិការសេដ្ឋកិច្ចអាស៊ីប៉ាស៊ីហ្វិក (APEC) ជាទីដែលមានការរំពឹងទុកខ្ពស់នៃជំនួបជាមួយសមភាគីចិន។

លោក Wi Sung-lac Wi បាននិយាយថា ប្រធានាធិបតីកូរ៉េខាងត្បូង Lee Jae Myung ត្រូវរំពឹងថានឹងបើកកិច្ចប្រជុំកំពូលជាមួយលោក Trump ក្នុងអំឡុងទស្សនកិច្ចនេះ នេះបើយោងតាមសារព័ត៌មានយ៉ុនហាប់។ គួរឱ្យដឹងថា លោក Lee នឹងធ្វើជាម្ចាស់ផ្ទះទទួលមេដឹកនាំ APEC នៅថ្ងៃទី៣១ ខែតុលា និងថ្ងៃទី១ ខែវិច្ឆិកា នៅទីក្រុងឆ្នេរសមុទ្រភាគអាគ្នេយ៍ Gyeongju ។

ជាមួយគ្នានេះ ទីក្រុងសេអ៊ូល ក៏កំពុងសម្របសម្រួលដាច់ដោយឡែកជាមួយទីក្រុងប៉េកាំង ដើម្បីសម្រេចចុងក្រោយនូវដំណើរទស្សនកិច្ចថ្ងៃទី៣០ ខែតុលា របស់លោកប្រធានាធិបតីចិន Xi Jinping។ លោក Xi ធ្វើទស្សនកិច្ចចុងក្រោយបង្អស់នៅកូរ៉េខាងត្បូង ក្នុងឆ្នាំ២០១៤ ខណៈទស្សនកិច្ចចុងក្រោយរបស់លោក Trump គឺនៅឆ្នាំ២០១៩ ជាពេលដែលលោកបានជួបមេដឹកនាំកូរ៉េខាងជើង Kim Jong Un នៅក្នុងតំបន់គ្មានយោធា DMZ។

លោក Trump ធ្លាប់និយាយថា លោកនឹងជួបជាមួយលោក Xi ក្នុងអំឡុងទស្សនកិច្ចទៅកូរ៉េខាងត្បូងនោះ ស្របពេលកិច្ចចរចារពន្ធដែលកំពុងបន្តរវាងប្រទេសសេដ្ឋកិច្ចធំជាងគេទាំងពីរ៕