ក្រុមហ៊ូទីនៅប្រទេសយេម៉ែន បាននិយាយថា មេបញ្ជាការរបស់ខ្លួន លោក Muhammad Abd al-Karim al-Ghamari ជាមន្ត្រីយោធាជាន់ខ្ពស់ម្នាក់របស់ក្រុមត្រូវបានសម្លាប់ខណៈពេលកំពុងបំពេញភារកិច្ចរបស់លោក។

ភ្លាមៗបន្ទាប់ពីការប្រកាសរបស់ក្រុមហ៊ូទីកាលពីថ្ងៃព្រហស្បតិ៍ អ៊ីស្រាអែលបានអះអាងទទួលខុសត្រូវចំពោះការសម្លាប់នេះ ដោយរដ្ឋមន្ត្រីក្រសួងការពារជាតិលោក Israel Katz បាននិយាយថា លោក al-Ghamari បានរងការវាយប្រហាររបស់អ៊ីស្រាអែល។

ក្រុមហ៊ូទី បាននិយាយនៅក្នុងសេចក្តីថ្លែងការណ៍ថា ជម្លោះជាមួយអ៊ីស្រាអែលនៅមិនទាន់បញ្ចប់ទេ។ អ៊ីស្រាអែល នឹងទទួលទណ្ឌកម្មគួរឲ្យញញើតចំពោះឧក្រិដ្ឋកម្មដែលខ្លួនបានប្រព្រឹត្ត។

កាលពីខែសីហា អ៊ីស្រាអែលបាននិយាយថា ខ្លួនបានកំណត់គោលដៅលើមន្ត្រីជាន់ខ្ពស់នៅក្នុងក្រុមនេះ រួមទាំង លោក al-Ghamari ក្នុងការវាយប្រហារតាមអាកាសលើរដ្ឋធានីសាណា ដោយបានសម្លាប់នាយករដ្ឋមន្ត្រីនៃរដ្ឋាភិបាលគ្រប់គ្រងដោយក្រុមហ៊ូទីនៅយេម៉ែន និងរដ្ឋមន្ត្រីមួយចំនួនទៀត។

នៅក្នុងការបង្ហោះលើបណ្តាញផ្សព្វផ្សាយសង្គមកាលពីថ្ងៃព្រហស្បតិ៍ លោក Katz បាននិយាយថា លោក al-Ghamari ត្រូវបានវាយប្រហារនៅក្នុងការវាយប្រហាររបស់អ៊ីស្រាអែល ហើយ«យើងនឹងធ្វើដូចគ្នានេះប្រឆាំងនឹងការគំរាមកំហែងនៅពេលខាងមុខ»។

ការស្លាប់របស់លោក Al-Ghamari ត្រូវបានប្រកាសរយៈពេល៦ថ្ងៃក្នុងបទឈប់បាញ់ដ៏ផុយស្រួយដែលគាំទ្រដោយសហរដ្ឋអាមេរិករវាងអ៊ីស្រាអែល និងក្រុមហាម៉ាស នៅតំបន់ហ្កាហ្សា។