មន្ត្រីរបស់កម្មវិធីអភិវឌ្ឍន៍អង្គការសហប្រជាជាតិ (UNDP) បាននិយាយកាលពីថ្ងៃព្រហស្បតិ៍ (១៦ តុលា) ក្នុងអំឡុងពេលដំណើរទស្សនកិច្ចទៅកាន់តំបន់ហ្កាហ្សាថា មានកម្ទេចកម្ទីបែកបាក់ជិត ៥៥លានតោន នៅទូទាំងតំបន់ហ្កាហ្សាស្រ្ទីប ដែលចាំបាច់ត្រូវសម្អាតឱ្យបានរួចរាល់ជាមុនសិន នៅក្នុងដំណាក់កាលដំបូងនៃការសាងសង់ឡើងវិញនៃតំបន់ប៉ាឡេស្ទីនមួយនេះ។

លោក Jaco Cilliers តំណាងពិសេសសម្រាប់កម្មវិធី UNDP នៃជំនួយដល់ប្រជាជនប៉ាឡេស្ទីន បាននិយាយថា៖ «ទំហំនេះស្មើនឹងប្រាសាទពីរ៉ាមីតជីហ្សារបស់អេហ្ស៊ីប ដល់ទៅ ១៣កន្លែង ដែលមានន័យថា ទំហំដ៏ធំធេងនៃបញ្ហាប្រឈមក៏នឹងត្រូវជួបប្រទះផងដែរ»។

ផ្នែកដ៏ធំរបស់តំបន់ហ្កាហ្សា ត្រូវបានកម្ទេចទៅជាវាលរហោស្ថាន ដោយការទម្លាក់គ្រាប់បែកឥតឈប់ឈររបស់អ៊ីស្រាអែល ក្នុងរយៈពេលពីរឆ្នាំមកនេះ ដែលបានសម្លាប់មនុស្សប្រហែល ៦៨.០០០នាក់ នេះបើយោងតាមអាជ្ញាធរសុខាភិបាលហ្កាហ្សា។

មួយផ្នែកធំនៃការបំផ្លិចបំផ្លាញខ្លាំងជាងគេគឺនៅទីក្រុងហ្កាហ្សា ជាទីនៃការប្រយុទ្ធយ៉ាងកំណាចបំផុត។ យោងតាមមជ្ឈមណ្ឌលផ្កាយរណបរបស់អង្គការសហប្រជាជាតិ (UNOSAT) បានឱ្យដឹងថា ប្រហែល ៨៣% នៃរចនាសម្ព័ន្ធអគារទាំងអស់នៅទីនោះ ត្រូវបានខូចខាត។ UNDP និយាយថា ខ្លួនបានសម្អាតកម្ទេចកម្ទីប្រមាណ ៨១.០០០តោន រួចហើយនៅហ្កាហ្សា ហើយកំពុងបន្តប្រតិបត្តិការទៅមុខទៀត៕