ទាហានអ៊ុយក្រែនដែលកំពុងប្រយុទ្ធនៅជិតក្រុង Pokrovsk បាននិយាយថា មីស៊ីល Tomahawk អាចផ្លាស់ប្តូរសង្រ្គាមដែលកំពុងនៅបន្តជាមួយរុស្ស៊ី។ ខណៈការបាញ់ផ្លោងទៅកាន់យោធារុស្ស៊ីនៅជួរមុខដ៏ខ្លាំងក្លាបំផុតនៅជិតទីក្រុងឧស្សាហកម្ម Pokrovsk ដែលកំពុងប្រយុទ្ធគ្នា ទាហានកងពលទី១៥២ របស់អ៊ុយក្រែន បានស្តាប់ឮនូវអ្វីដែលពួកគេសង្ស័យថាជាយានដ្រូនFPV របស់រុស្ស៊ីនៅពីលើទីតាំងរបស់ខ្លួន។

បន្ទាប់ពីមានភាពស្ងៀមស្ងាត់មួយរយៈដើម្បីកុំឲ្យមានការប្រទះឃើញដោយយានដ្រូន ទាហានបានបន្តបាញ់កាំភ្លើងធំ១៥៥មីលីម៉ែត្ររបស់សម្ព័ន្ធយោធាណាតូពីកាំភ្លើងធំបាញ់ផ្លោង M-114 បុរាណរបស់ពួកគេ ដែលត្រូវបានដាក់ពង្រាយជាលើកដំបូងដោយកងទ័ពសហរដ្ឋអាមេរិកក្នុងអំឡុងសង្គ្រាមលោកលើកទីពីរ។

លោក Roman Kostiuk មេបញ្ជាការនៃអង្គភាពកាំភ្លើងធំ បាននិយាយថា សហរដ្ឋអាមេរិកបានផលិតមីស៊ីលស៊ីបគោលដៅ Tomahawk «អាចផ្លាស់ប្តូរជាមូលដ្ឋាននៃសង្រ្គាមឱ្យកាន់តែប្រសើរ»។ មីស៊ីលវាយប្រហារលើដីគោក Tomahawk ជាធម្មតាត្រូវបានបាញ់ចេញពីសមុទ្រ ដើម្បីវាយប្រហារគោលដៅនានាក្នុងបេសកកម្មវាយប្រហារចូលជ្រៅ។

មីស៊ីល Tomahawk ស៊ីបគោលដៅ អាចវាយប្រហារគោលដៅនានាពីចម្ងាយ១.៦០០គីឡូម៉ែត្រ ទោះបីនៅក្នុងដែនអាកាសដែលការពាររឹងមាំក៏ដោយ។ កាលពីខែមុន ប្រធានាធិបតីអ៊ុយក្រែន លោក Volodymyr Zelenskyy បានស្នើឱ្យសហរដ្ឋអាមេរិកលក់មីស៊ីល Tomahawks ទៅឱ្យបណ្តាប្រទេសអឺរ៉ុប ដែលនឹងបញ្ជូនវាទៅឲ្យអ៊ុយក្រែន ក្នុងកិច្ចខិតខំប្រឹងប្រែងដើម្បីវាយរុញច្រានប្រឆាំងការឈ្លានពានរបស់រុស្ស៊ី។