និយតករទីផ្សាររបស់ប្រទេសចិន បាននិយាយនៅថ្ងៃសុក្រ (១៧ តុលា) នេះថា ក្រុមហ៊ុនផលិតរថយន្តរបស់ចិន BYD នឹងចេញសេចក្ដីប្រកាសប្រមូលមកវិញដ៏ធំបំផុតមិនធ្លាប់មាន នូវរថយន្តស៊េរី ថាង (Tang) និង យ័ន ប្រូ (Yuan Pro) ក្នុងចំនួនជាង ១១៥.០០០គ្រឿង ដែលផលិតនៅចន្លោះឆ្នាំ២០១៥ និង ២០២២ ដោយសារបញ្ហារចនាបថឌីស្សាញ និងហានិភ័យសុវត្ថិភាពទាក់ទងនឹងថ្ម។

BYD បានដាក់ឯកសារផែនការមួយទៅរដ្ឋបាលរបស់រដ្ឋ សម្រាប់បទប្បញ្ញត្តិទីផ្សារដើម្បីប្រមូលរថយន្តស៊េរី Tang ចំនួន ៤៤.៥៣៥គ្រឿង មកវិញ ដែលផលិតនៅចន្លោះខែមីនា ឆ្នាំ២០១៥ ដល់ខែកក្កដា ឆ្នាំ២០១៧ ដែលក្នុងនោះគុណវិបត្តិនៃការរចនាបថផ្នែកខ្លះ អាចបណ្តាលឱ្យមុខងាររថយន្តដំណើរការមិនប្រក្រតី។ ជាមួយគ្នានេះ BDY ក៏ចង់ប្រមូលរថយន្តអគ្គិសនី Yuan Pro ចំនួន ៧១.២៤៨គ្រឿង ដែលផលិតនៅចន្លោះខែកុម្ភៈ ឆ្នាំ២០២១ ដល់ខែសីហា ឆ្នាំ២០២២ ដោយសារបញ្ហាផលិតកម្មប៉ះពាល់ដល់ការដំឡើងថ្ម។

នៅក្នុងខែមករាកន្លងទៅ ក្រុមហ៊ុននេះបានប្រមូលមកវិញនូវរថយន្តប្រភេទ ហ្វាងឆឹងប៉ាវ ប៉ាវ 5 (Fangchengbao Bao 5) ប្រភេទអគ្គិសនីលាយសាំង Off-Road SUV ចំនួន ៦.៨៤៣គ្រឿង ដោយលើកឡើងពីហានិភ័យបង្កជាចំហេះ។ មុននោះទៅទៀតក្នុងខែកញ្ញា ឆ្នាំ២០២៤ BYD ក៏បានប្រមូលរថយន្ត Dolphin និង Yuan Plus EV ជិត ៩៧.០០០គ្រឿងទៅវិញ ដោយសារកំហុសការផលិត ពាក់ព័ន្ធនឹងមុងងារគ្រប់គ្រងដៃចង្កូត៕