តាមការកំណត់នៅថ្ងៃទី២០ ខែតុលា ឆ្នាំ២០២៥ខាងមុខនេះ អាកាសយានដ្ឋានអន្តរជាតិតេជោ នឹង​សម្ពោធជាផ្លូវការក្រោមអធិបតីភាពដ៏ខ្ពង់ខ្ពស់សម្តេចនាយករដ្ឋមន្រ្តី ហ៊ុន ម៉ាណែត។ ជា​មួយ​នេះ ​ប្រជាពលរដ្ឋបានសម្តែងការអបអរសាទរ និងជូនពរព្រលានថ្មីនេះឱ្យទទួលបានជោគជ័យ។

អ្នកស្រី សុខុម ស្រីល័ក្ខណ ពលរដ្ឋរស់នៅរាជធានីភ្នំពេញ និងកំពុង​រង់ចាំ​ហោះ​ហើរ​ជាមួយ​ក្រុម​គ្រួសារ​ទៅទេសចរណ៍នៅក្រៅប្រទេស បាននិយាយប្រាប់ព័ត៌មាន ប៊ីធីវី នៅព្រឹកថ្ងៃទី១៧ ខែ​តុលា​នេះ​ថា ចាប់តាំងពីព្រលានថ្មីដាក់ឱ្យដំណើរការរយៈពេលជាងមួយខែមកនេះ គឺ​ជា​លើក​ទីមួយហើ​យ ដែលអ្នកស្រីបានមកដោយផ្ទាល់ និងមើលឃើញថា ពិតជាមាន​មោទ​នភា​ព​ជា​ខ្លាំង​ដែល​ខ្មែរ​អាច​ធ្វើបាន ពីព្រោះមិននឹកស្មានថា ប្រទេសកម្ពុជាអាច​កសាង​សមិទ្ធផល​ដ៏​ធំ និង​អស្ចារ្យ​បែប​នេះ ដែលមិនចាញ់ ប្រទេសផ្សេងឡើយ ខណៈមកដល់ពេលនេះ​អ្នក​ស្រី​បាន​ទេសចរណ៍​នៅក្រៅ​ប្រទេសបានចំនួន ២៥ប្រទេសឯណោះ។

កំពុងរង់​ចាំ​ការហោះហើរទៅទិសដៅផ្សេងៗគ្នានេះដែរ ក្រុមប្រជាពលរដ្ឋ បាន​លើក​ឡើង​ដោយ​ទឹក​មុខ​សប្បាយរីករាយថា វត្តមានរបស់អាកាសយានដ្ឋានអន្តរជាតិតេជោថ្មីនេះ សាង​សង់​ឡើង​ប្រកប​ដោយ​រចនា​​បទ​ជាខ្មែរច្រើន និងមានភាពទាក់ទាញជាខ្លាំងពីសំណាក់ភ្ញៀវជាតិ និង​អន្តរជាតិ​។

ក្រុមប្រជាពលរដ្ឋ បានឱ្យដឹងស្រដៀងគ្នាទៀតថា ព្រលានថ្មីនេះ គឺជាសមិទ្ធ​ផល​ថ្មី​មួយ​ថែម​ទៀត​ដែល​បាន​កើត​ឡើងដោយការខិតខំប្រឹងប្រែងរបស់រាជរដ្ឋាភិបាលកម្ពុជា ក្នុងការធ្វើសកម្ម​ភាព​ដើម្បី​មាន​ភាព​រី​កចម្រើននៅក្នុងយុគសម័យសម្តេចតេជោ និងសម្តេចធិបតី។

សូមបញ្ជាក់បន្ថែមថា អាកាសយានដ្ឋាននេះ ក្រុមហ៊ុន ខេមបូឌា អ៊ែរផត អ៊ិនវេសមិន ឯ.ក គឺជា​ក្រុម​ហ៊ុន​ចម្រុះបង្កើតឡើងរួមគ្នាដោយ ក្រុមហ៊ុន OCIC និងរដ្ឋលេខាធិការដ្ឋា​ន​អាកាស​ចរ​ស៊ីវិល​កម្ពុជា​ក្នុង​ឆ្នាំ២០១៨ ក្រោមការណែនាំរបស់សម្តេចអគ្គមហាសេនាបតីតេជោ ហ៊ុន សែន អតីត​នាយ​ក​រដ្ឋមន្រ្តី បច្ចុប្បន្នជាប្រធានព្រឹទ្ធសភាកម្ពុជា ដើម្បីធ្វើការងារសាងសង់ព្រលានថ្មីមួយនេះ។ អាកាសយានដ្ឋានថ្មីនេះលំដាប់ 4F មានសមត្ថភាពទទួលបានការហោះហើរ ពីឆ្ងាយ​ឆ្លង​ទ្វីប​ដោយ​អាច​ឱ្យ​យន្តហោះធុនធំរហូតដល់ Airbus A380-800 និងយន្តហោះ Boeing 747-800 ចុះ​ចតបាន។ ជាពិសេស អាចទទួលអ្នកដំណើរឆ្លងកាត់បាន១៣លាននាក់ក្នុងមួយឆ្នាំ នៅ​ក្នុង​ដំណាក់​កាល​ទី១ ពីឆ្នាំ២០២៥-២០៣០ និងកើនដល់ ៣០លាននាក់ នៅដំណាក់កាលពីទី២ ពី​ឆ្នាំ​២០៣0-២០៥០៕ អត្ថបទ៖ ឈិត បូរ៉ាវី