អគ្គនាយកដ្ឋានសុខភាពសត្វ និងផលិតកម្ម និងអង្គការផ្តល់សេវាបសុពេទ្យអន្តរជាតិប្រចាំកម្ពុជា រួម​ជាមួយ​នឹងដៃគូក្នុងស្រុកជាច្រើនទៀត បាននឹងកំពុង​រៀបចំ​យុទ្ធនាការ​ចាក់វ៉ាក់​សាំង​ការពារ​ជំងឺ​ឆ្កែ​ឆ្កួត​ដល់​សត្វសុខននៅក្នុងរាជធានីភ្នំពេញ ខេត្តកណ្តាល និងខេត្តបាត់ដំបង ដែល​ធ្វើ​ឡើង​ចាប់​ពី​ថ្ងៃ​ទី២០ ដល់ថ្ងៃទី៣១ ខែតុលា ឆ្នាំ២០២៥។

លោកស្រី ហេង បូរ៉ានី អគ្គនាយិការង នៃអគ្គនាយកដ្ឋានសុខភាពសត្វ និងផលិតកម្មសត្វ នៅ​ព្រឹក​ថ្ងៃ​ទី១៧ ខែតុលានេះ បានមានប្រសាសន៍ថា ជំងឺឆ្កែឆ្កួតជាបញ្ហាមួយគួរឱ្យព្រួយបារម្ភ និង​ជា​អាទិភាព​នៅ​ក្នុងតំបន់ក៏ដូចជាក្នុងពិភពលោក ដើម្បីធានាបាននូវការថែរក្សាសុខភាពមនុស្ស សត្វ ក្រសួងកសិកម្ម បានចុះអប់រំណែនាំផ្សព្វផ្សាយដល់សាធារណៈជន ដើម្បីបង្កើនការយល់ដឹង និង​ផ្លាស់​ប្តូរ​ឥរិយាបទប្រកបដោយប្រសិទ្ធភាព ដើម្បី​ឆ្លើយ​តប​នឹង​ស្ថាន​ភាព​ជាក់​ស្តែង និង​តម្រូវ​ការ​ពិត​ប្រាកដ​ក្នុង​ការលុបបំបាត់ជំងឺឆ្កែឆ្កួតនៅកម្ពុជា ស្របតាមគោលដៅ​សកល​លុប​បំបាត់​ជំងឺ​នេះ​នៅ​ឆ្នាំ​២០៣០។

យុទ្ធនាការចាក់ថ្នាំការពារជំងឺឆ្កែឆ្កួតនេះ គឺជាគម្រោងដ៏ធំបំផុតនៅអាស៊ីអាគ្នេយ៍។ គម្រោងនេះ នឹង​ដាក់​មូលដ្ឋានគ្រឹះ សម្រាប់យុទ្ធនាការចាក់ថ្នាំការពារជំងឺឆ្កែឆ្កួតថ្នាក់ជាតិ បន្ទាប់​ពី​ផែន​ការ​យុទ្ធ​សាស្ត្រ​ជាតិ​សម្រាប់ប្រយុទ្ធ និងលុបបំបាត់ជំងឺឆ្កែឆ្កួត នៅកម្ពុជាត្រូវបានអនុម័ត ដោយសារ​ខេត្ត​ទាំង​បី​នេះ រួមមាន រាជធានីភ្នំពេញ ខេត្តកណ្តាល និងខេត្តបាត់ដំបង គឺជាជំហានដ៏ធំដំបូង សម្រាប់​ការ​គ្រប់គ្រងជំងឺឆ្កែឆ្កួតនៅប្រទេសកម្ពុជា។

ការ​ចាក់វ៉ាក់សាំងបង្ការជំងឺឆ្កែឆ្កួតនេះ គឺត្រូវបានផ្តល់ជូនដល់សត្វសុខនទាំងអស់ដោយឥតគិតថ្លៃ ក្នុង​គោលបំណងដើម្បីបញ្ឈប់ការរីករាលដាលនៃមេរោគ និង​ការពារ​ដល់​សហគមន៍​ដែល​ជា​តំបន់​គោ​លដៅទាំងនេះ។

លោក ថុល ថានី អ្នកគ្រប់គ្រងកម្មវិធីប្រយុទ្ធនិងជំងឺឆ្កែឆ្កួត បានឱ្យដឹងថា ប្រទេសកម្ពុជា បាន​ធ្វើ​យុទ្ធ​នាការចាក់វ៉ាក់សាំងបង្ការជំងឺឆ្កែឆ្កួតនៅក្នុងខេត្តចំនួនបី បានយ៉ាង​ជោគជ័យ​កាល​ពី​ឆ្នាំ​២០២៤​ ដោយបានចាក់វ៉ាក់សាំងដល់សត្វឆ្កែរហូតដល់ជាង ២២ម៉ឺនក្បាល ដែលជា​ចំនួន​មិន​គួ​រ​ឱ្យ​ជឿក្នុ​ងរយៈពេល១៥ថ្ងៃប៉ុណ្ណោះ។ គម្រោងនេះត្រូវបានបន្តទៀតនៅឆ្នាំ២០២៥ ដោយ​ត្រូវ​បាន​រំពឹង​ទុកថាវានឹងរក្សានូវសន្ទុះនៃការគ្រប់គ្រងជំងឺឆ្កែឆ្កួតនៅកម្ពុជាបានយ៉ាងល្អ៕ អត្ថបទ៖ ឈិត បូរ៉ាវី