សហព័ន្ធកីឡាបាល់ទាត់អន្តរជាតិ FIFA បាននិយាយកាលពីថ្ងៃព្រហស្បតិ៍ (១៦ តុលា) ថា មកទល់ពេលនេះ សំបុត្រច្រើនជាង ១លានសន្លឹក ត្រូវបានលក់រួចទៅហើយសម្រាប់ការប្រកួតបាល់ទាត់ពិភពលោក World Cup ឆ្នាំក្រោយនេះ នៅក្នុងបច្ចុប្បន្នភាពលើកដំបូងរបស់ខ្លួនអំពីចំនួនលក់ ចាប់តាំងពីចាប់ផ្តើមលក់សំបុត្រជាផ្លូវការនៅដើមខែតុលានេះមក។

ដូចដែលបានរំពឹងទុក តម្រូវការច្រើនបំផុតគឺមកពីអ្នកទិញនៅសហរដ្ឋអាមេរិក កាណាដា និងម៉ិកស៊ិក — ដែលប្រទេសអាមេរិកខាងជើងទាំងបីនេះ នឹងធ្វើជាម្ចាស់ផ្ទះនៃការប្រកួត។ FIFA បាននិយាយថា មនុស្សមកពី ២១២ប្រទេស និងដែនដីផ្សេងៗគ្នាបានទិញសំបុត្រទុកចូលទស្សនារួចហើយ។

FIFA បាននិយាយទៀតថា ជារួម ប្រទេសកំពូលទាំង១០ ទាក់ទងនឹងសំបុត្រដែលបានទិញរួចមានដូចជា៖ អង់គ្លេស អាល្លឺម៉ង់ ប្រេស៊ីល អេស្ប៉ាញ កូឡុំប៊ី អាហ្សង់ទីន និងបារាំង តាមលំដាប់លំដោយ។ គួរឱ្យដឹងថា ការប្រកួត World Cup នេះចាប់ផ្តើមពីថ្ងៃទី១១ ខែមិថុនា រហូតដល់ថ្ងៃទី១៩ ខែកក្កដា ឆ្នាំ២០២៦។

FIFA ក៏ប្រកាសផងដែរថា គេហទំព័រ "លក់សំបុត្របន្ត" របស់ខ្លួនបានបើកហើយ ហើយសំបុត្រសម្រាប់ការប្រកួតវគ្គផ្តាច់ព្រ័ត្រ World Cup នៅកីឡដ្ឋានតំបន់ East Rutherford រដ្ឋ New Jersey របស់អាមេរិក មានលក់នៅទីនោះ ក្នុងតម្លៃចាប់ពី ៩.៥៣៨ដុល្លារ ដល់ ៥៧.៥០០ដុល្លារ ក្នុងមួយកៅអី គិតត្រឹមរសៀលថ្ងៃព្រហស្បតិ៍សប្ដាហ៍នេះ។

FIFA មិនបានបង្ហាញតួលេខជាក់លាក់ថាតើសំបុត្រសរុបប៉ុន្មានត្រូវបានលក់ ឬសេចក្ដីលម្អិតក្នុងគេហទំព័រម្ចាស់ផ្ទះទេ ហើយ FIFA ក៏មិនដែលបានចេញតារាងតម្លៃសំបុត្រឡើយ ដូចទៅនឹងការប្រកួត World Cup ពីមុនៗ ចាប់តាំងពីឆ្នាំ១៩៩០ មក៕