ក្រុមហាម៉ាសបានបញ្ជាក់ពីការបន្តការប្តេជ្ញាចិត្តរបស់ខ្លួន ក្នុងការអនុវត្តបទឈប់បាញ់ជាមួយអ៊ីស្រាអែល ខណៈពេលដែលបង្ហាញថា ការទាញយកសាកចំណាប់ថ្នូរអ៊ីស្រាអែលដែលនៅសល់ទាំងអស់ នឹងត្រូវការពេលវេលាបន្ថែម ដោយសារបញ្ហាប្រឈមបច្ចេកទេសជាច្រើន ហើយកាលពីថ្ងៃព្រហស្បតិ៍ (ទី១៦ ខែតុលា) ក្រុមសកម្មប្រយុទ្ធប៉ាឡេស្ទីនមួយនេះ បានចេញសេចក្តីថ្លែងការណ៍មួយ ដោយសង្កត់ធ្ងន់លើការយកចិត្តទុកដាក់របស់ខ្លួន ក្នុងការបំពេញលក្ខខណ្ឌនៃកិច្ចព្រមព្រៀង ក្នុងនោះរួមទាំងការប្រគល់ត្រឡប់នូវអដ្ឋិធាតុចំណាប់ថ្នូរទាំងអស់ តែទទួលស្គាល់ថា ដំណើរការនេះ «នឹងចំណាយពេល» ដោយសារឧបសគ្គនៃប្រតិបត្តិការបច្ចុប្បន្ន។

ក្រុមនេះបានពន្យល់ថា ការស្វែងរក និងការទាញយកសាកសពនៅសល់ទាំងនោះ គឺមានការលំបាកយ៉ាងខ្លាំង ដោយសារតែ «មួយចំនួនត្រូវបានកប់នៅក្នុងផ្លូវរូងក្រោមដីដែលត្រូវបានបំផ្លាញដោយក្រុមត្រួតត្រា (អ៊ីស្រាអែល) ខណៈដែលអ្នកផ្សេងទៀត នៅតែស្ថិតនៅក្រោមគំនរបាក់បែកនៃអគារដែលត្រូវបានបំផ្លាញដោយការទម្លាក់គ្រាប់បែក។ ក្រុមហាម៉ាសបានសង្កត់ធ្ងន់ពីតម្រូវការឲ្យមានឧបករណ៍ធុនធ្ងន់ និងឧបករណ៍ឯកទេស ដើម្បីសម្អាតកម្ទេចកម្ទី ដោយកត់សម្គាល់ថា ធនធានទាំងនេះនៅតែ «មិនអាចយកចូលបាននាពេលបច្ចុប្បន្ន ដោយសារតែការហាមឃាត់ពីក្រុមអ្នកត្រួតត្រា នៅតំបន់ហ្កាហ្សា» ទោះបីជាមានកិច្ចព្រមព្រៀងបទឈប់បាញ់ជាបន្តបន្ទាប់ក៏ដោយ។

ក្រុមហាម៉ាសបានបញ្ជាក់ថា ការយឺតយ៉ាវនៃការទាញយកសាកសពមកវិញ គឺពាក់ព័ន្ធដោយផ្ទាល់ទៅនឹងការរឹតបន្តឹងរបស់រដ្ឋាភិបាលអ៊ីស្រាអែល ដោយចោទប្រកាន់អាជ្ញាធរនេះថា រាំងខ្ទប់ដល់មធ្យោបាយចាំបាច់ សម្រាប់ដំណើរការនេះ ខណៈពេលដែលរិះគន់នាយករដ្ឋមន្រ្តី លោក Benjamin Netanyahu ថា បាន «បរាជ័យក្នុងការបំពេញតាមការសន្យារបស់លោក»។ សេចក្តីថ្លែងការណ៍របស់ក្រុមនេះសំដៅទៅដំណាក់កាលដំបូងនសបទឈប់បាញ់ ដែលត្រូវបានអនុវត្តកាលពីថ្ងៃទី១០ ខែតុលា ក្រោមការសម្រុះសម្រួលរបស់សហរដ្ឋអាមេរិក ដែលបានជួយសម្រួលរួចហើយឲ្យមានការដោះលែងពីសំណាក់ក្រុមហាម៉ាសនូវអ្នកទោសជនជាតិអ៊ីស្រាអែលនៅរស់ចំនួន ២០នាក់ និងសាកសពចំណាប់ថ្នូរ ១០នាក់នៃចំនួន ២៨នាក់ដែលត្រូវបានបញ្ជាក់ថា ស្លាប់៕