អង្គការសហប្រជាជាតិ (UN) នៅថ្ងៃសុក្រ (ទី១៧ ខែតុលា) នេះ បានព្រមានថា ស្ទើរតែ ៨០ភាគរយនៃប្រជាជនក្រីក្របំផុតរបស់ពិភពលោក ឬប្រហែល ៩០០លាននាក់ ត្រូវប្រឈមនឹងហានិភ័យដោយផ្ទាល់ ពីអាកាសធាតុដែលមានសភាពកាន់តែធ្ងន់ធ្ងរឡើងៗ ដោយសារការឡើងកម្ដៅផែនដី ដោយអ្នកទាំងអស់នោះទទួលរងនូវ «បន្ទុកទ្វេដង និងមិនយុត្តិធម៌ធំឡើងៗ»។

អ្នកគ្រប់គ្រងស្តីទីនៃកម្មវិធីអភិវឌ្ឍន៍របស់ UN (UNDP) លោក Haoliang Xu បានប្រាប់ឲ្យដឹងនៅក្នុងសេចក្តីថ្លែងការណ៍មួយថា៖ «គ្មាននរណាម្នាក់មានភាពស៊ាំនឹងផលប៉ះពាល់ពីការប្រែប្រួលអាកាសធាតុដែលកាន់តែញឹកញាប់ និងខ្លាំងជាងមុន ដូចជាគ្រោះរាំងស្ងួត ទឹកជំនន់ រលកកម្ដៅ និងការបំពុលខ្យល់បរិយាកាសនោះឡើយ ប៉ុន្តែគឺប្រជាជនក្រីក្របំផុត ក្នុងចំណោមពួកយើង ដែលកំពុងប្រឈមនឹងផលប៉ះពាល់ធ្ងន់ធ្ងរបំផុត»។ លោកបានបន្ថែមថា COP30 ដែលជាកិច្ចប្រជុំកំពូលអាកាសធាតុរបស់ UN ក្នុងប្រទេសប្រេស៊ីល កាលពីខែវិច្ឆិកា «គឺជាពេលវេលា ដើម្បីឲ្យបណ្ដាមេដឹកនាំពិភពលោកពិនិត្យមើលសកម្មភាពអាកាសធាតុថា ជាលក្ខខណ្ឌ ប្រឆាំងនឹងភាពក្រីក្រ»។

យោងតាមការសិក្សាប្រចាំឆ្នាំដែលចេញផ្សាយដោយអង្គការ UNDP រួមជាមួយ Oxford Poverty និង Human Development Initiative បានឲ្យដឹងថា ប្រជាជន ១,១ពាន់លាននាក់ ឬប្រហែល ១៨ភាគរយនៃចំនួន ៦,៣ពាន់លាននាក់ ក្នុង ១០៩ប្រទេសដែលត្រូវបានវិភាគ រស់នៅក្នុងភាពក្រីក្រ «ធ្ងន់ធ្ងរខ្លាំង» ដោយផ្អែកលើកត្តានានា ដូចជាការស្លាប់របស់ទារក និងលទ្ធភាពទទួលបានលំនៅឋាន អនាម័យ អគ្គិសនី និងការអប់រំ។ 

របាយការណ៍នេះ បង្ហាញពីការជាប់ទាក់ទងគ្នា រវាងភាពក្រីក្រ និងការប៉ះពាល់ ដោយសារហានិភ័យបរិស្ថានចំនួន៤ ដូចជាកម្ដៅឡើងក្ដៅខ្លាំង គ្រោះរាំងស្ងួត ទឹកជំនន់ និងការបំពុលខ្យល់។ តំបន់២ ដែលរងផលប៉ះពាល់ជាពិសេស ដោយភាពក្រីក្របែបនេះ គឺអនុតំបន់សាហារ៉ាអាហ្រ្វិក និងអាស៊ីខាងត្បូង ហើយតំបន់ទាំងនេះ ក៏ងាយរងគ្រោះខ្លាំង ដោយសារផលប៉ះពាល់ពីការប្រែប្រួលអាកាសធាតុផងដែរ។ 

របាយការណ៍បានបញ្ជាក់ថា ជារួម ប្រជាជន ៨៨៧លាននាក់ ឬជិត ៧៩ភាគរយនៃចំនួនប្រជាជនក្រីក្រ ត្រូវបានប៉ះពាល់ដោយផ្ទាល់យ៉ាងហោចណាស់មួយ ក្នុងចំណោមការគំរាមកំហែងទាំងនេះ ដោយមនុស្ស ៦០៨លាននាក់ប្រឈមនឹងកម្ដៅក្ដៅខ្លាំង ៥៧៧លាននាក់រងប៉ះពាល់ដោយការបំពុល ៤៦៥លាននាក់ដោយទឹកជំនន់ និង ២០៧លាននាក់ដោយគ្រោះរាំងស្ងួត៕