មន្ត្រីហិរញ្ញវត្ថុមកពីក្រុមប្រទេសមានសេដ្ឋកិច្ចរីកលូតលាស់ទាំង២០(G20) និយាយថា ការរំខានដល់ខ្សែច្រវ៉ាក់ផ្គត់ផ្គង់ពិភពលោក បង្កហានិភ័យដ៏មានសក្តានុពលដល់កំណើន។ រដ្ឋមន្ត្រីទាំងអស់បានសម្តែងការព្រួយបារម្ភរបស់ខ្លួនមួយសប្តាហ៍បន្ទាប់ពីប្រទេសចិនបានប្រកាសពីការរឹតត្បិតតឹងរ៉ឹងលើការនាំចេញរ៉ែកម្រ។

ប្រទេសអាហ្រ្វិកខាងត្បូង បានធ្វើជាប្រធានកិច្ចប្រជុំនៃរដ្ឋមន្ត្រីហិរញ្ញវត្ថុ G20 និងប្រធានធនាគារកណ្តាលនៅទីក្រុងវ៉ាស៊ីនតោន ហើយបានចេញសេចក្តីសង្ខេបមួយបន្ទាប់ពីកិច្ចប្រជុំបានបញ្ចប់កាលពីថ្ងៃព្រហស្បតិ៍។ សេចក្តីថ្លែងការណ៍មិនបានលើកឡើងពីឈ្មោះប្រទេសចិននោះទេ ប៉ុន្តែបាននិយាយថា កំណើនសេដ្ឋកិច្ចពិភពលោកប្រឈមនឹងបញ្ហា«ស្មុគស្មាញ» រួមទាំងភាពតានតឹងពាណិជ្ជកម្ម និងការរំខានដល់ខ្សែច្រវ៉ាក់ផ្គត់ផ្គង់។

រដ្ឋមន្ត្រីក្រសួងហិរញ្ញវត្ថុជប៉ុន លោក Kato Katsunobu ស្ថិតក្នុងចំណោមក្រុមរដ្ឋមន្ត្រីហិរញ្ញវត្ថុទាំងប្រាំពីរឬG7 ដែលបានលើកឡើងពីការព្រួយបារម្ភអំពីការរឹតត្បិតលើរ៉ែកម្ររបស់ប្រទេសចិន នៅពេលដែលក្រុមរដ្ឋមន្ត្រីបានជួបគ្នាកាលពីពេលមុន។ ទីក្រុងក្រុងប៉េកាំងបានប្រកាសកាលពីសប្តាហ៍មុនថា ខ្លួននឹងហាមឃាត់ការនាំចេញរ៉ែកម្រសម្រាប់ការប្រើប្រាស់ផ្នែកយោធា និងកំណត់ការនាំចេញបច្ចេកវិទ្យាដែលពាក់ព័ន្ធ។ ចំណាត់ការនេះបានកើតឡើងក្នុងពេលដែលភាពតានតឹងពាណិជ្ជកម្មបង្កឡើងដោយរដ្ឋបាល លោក Trump ចំពោះការដាក់ចេញវិធានការដំឡើងពន្ធ។