​បាល់បោះ៖ ​កីឡាករ​បាល់បោះ​អាមេរិក LeBron James បានជា​ពីរ​បួស ​និង​វិល​ចូល​ប្រកួត​វិញ​បោះ​បាន ២៩ពិន្ទុ​ជួយ​ឱ្យ Los Angeles Lakers យកឈ្នះ New York Knicks ១២២-១១៥ ក្នុង​ម៉ោង​បន្ថែម​។ ​​LA Lakers បាន​វាយបក​ពី​ការ​នាំមុខ ២១ពិន្ទុ​ពី New York Knicks ក្រោយ​លេង​បាន​ពាក់​កណ្តាលផ្លូវ​។

​​LeBron James ដែល​អវត្តមាន ៥ប្រកួត​មកហើយ​ដោយសា​រ​របួស​ជង្គង់​នោះ​បោះ​បាន ២៩ពិន្ទុ ១៣បាល់​រី​បោ​ន និង ១០បាល់​បញ្ជូន​។ ​​កីឡាករ Malik Monk ក៏​បោះ​បាន ២៩ពិន្ទុ​ផងដែរ​បូករួម​ទាំង Anthony Davis ២៨ពិន្ទុ​ឱ្យ LA Lakers ឡើងមក​លេខ ៩ ក្នុង​តារាង​ភាគ​ខាង​លិច​ប្រកួត​ឈ្នះ ២៦ ចាញ់ ២៨​។ ​​ចំណែកឯ New York Knicks កីឡាករ RJ Barrett បោះ​បាន​ម្នាក់ឯង ៣៦ពិន្ទុ​ច្រើនជាងគេ​ក្នុងការ​ប្រកួត​តែ​មិនអាច​ជួយ​ឱ្យ New York Knicks យកជ័យ​ជំនះបាន​ និង​ធ្លាក់​ដល់​លេខ ១២ នៅ​តារាង​ភាគ​ខាងកើត​ប្រកួត​ឈ្នះ ២៤ ចាញ់ ២៩​។ ងាក​​មក​ក្រុម​ការពារ​តំណែង​ជើងឯក Milwaukee Bucks រកបាន​ជ័យជំនះ ៦ ក្នុងចំណោម ៨ប្រកួត​ចុងក្រោយបន្ទាប់ពី​យកឈ្នះ Portland Trail Blazers ១៣៧-១០៨​។ ​​កីឡាករ Bobby Portis បោះ​បាន ៣០ពិន្ទុ​ម្នាក់ឯង​ដែល​បានមកពី​ការបោះ​បី​ពិន្ទុ ៦លើក ​ខណៈដែល Giannis Antetokounmpo បោះ​បាន ២៩ពិន្ទុ​ក្នុង​ជ័យជំនះ​។

​​Milwaukee Bucks បន្ត​ឈរ​លេខ ៣ ក្នុង​តារាង​ភាគ​ខាងកើត​ប្រកួត​ឈ្នះ ៣៣ ចាញ់ ២១ ខណៈ Portland Trail Blazers បន្ត​ចាញ់ ៥​ប្រកួត​ជាប់​គ្នា​ឈរ​លេខ ១០ នៅ​តារាង​ភាគ​ខាងលិច​ប្រកួត​ឈ្នះ ២១ ចាញ់ ៣៣​។ ​​ដោយឡែក​ក្រុម​ដែល​កំពុង​នាំមុខគេ​នៅ​តារាង​ភាគ​លិច Phoenix Suns បាន​យកឈ្នះ Washington Wizards ៩៥-៨០ ដែលជា​ជ័យជំនះ ១២ ក្នុង ១៣ប្រកួត​ចុងក្រោយ​។ ​​Memphis Grizzlies ក៏បាន​យកឈ្នះ Orlando Magic ដែរ​ក្នុង​លទ្ធផល ១៣៥-១១៥ ខណៈដែល Sacramento Kings យកឈ្នះ Oklahoma City Thunders ១១៣-១០៣ និង Miami Heat យកឈ្នះ Charlotte Hornets ១០៤-៨៦៕

​អត្ថបទ​៖​នាង សុភា​វុ​ធ